რამდენიმე წუთის წინ იუსტიციის მინისტრმა, თეა წულუკიანმა ბრიფინგი გამართა და დღეს ჩატარებულ აქციას გამოეხმაურა.
თეა წულუკიანის თქმით დღეს არცერთი უცხო ქვეყნის მოქალაქეზე მიწა არ დარეგისტრირებულა. მინისტრის თქმით, არ ღირს სხვა მოქალაქეების შეწუხება და მათთვის ხელის შეშლა.
მისი თქმით, ის ეჭვი, თითქოს მთავრობამ განიზრახა 5 დღეში მოასწროს მიწის (უცხო ქვეყნის მოქალაქეებზე) რეგისტრაციები, შეურაცხმყოფელია.
„ქართული მარში“, „პატრიოტთა ალიანსი" და მათი მხარდამჭერები დღეს იუსტიციის სახლთან საკონსტიტუციო სასამართლოს გადაწყვეტილებას აპროტესტებენ, რომლითაც სასოფლო-სამეურნეო დანიშნულების მიწების უცხოელებზე გასხვისების შემზღუდველი მორატორიუმი გაუქმდა. ისინი იუსტიციის მინისტრს მიმართავენ, არ დაუშვან მიწების უცხოელებზე გასხვისება. მათ დღეს იუსტიციის სახლის შესასვლელი დროებით გადაკეტილი ჰქონდათ.
