ადვოკატ მიხეილ რამიშვილის სარჩელი, რომლითაც ის ქორეპისკოპოს იაკობს პატივის, ღირსებისა და საქმიანი რეპუტაციის შელახვისთვის უჩიოდა, თბილისის საქალაქო სასამართლომ დააკმაყოფილა. რამიშვილის თქმით, მოსამართლე ირაკლი კოპალიანის გადაწყვეტილებით, ქორეპისკოპოსს დაევალა საჯაროდ უარყოს განცხადება, რომლითაც ცილი დასწამა ადვოკატს, ხოლო სიმბოლურად, ზიანის ანაზღაურებისთვის - ჯარიმის გადახდა.
„ეს იყო ცილისმწამებლური განცხადება, რომელიც ქორეპისკოსმა იაკობმა გააკეთა ტელეკომპანია „იბერიის“ ეთერში 2017 წლის 21 სექტემბერს. ის ბრალს მდებდა, თითქოს აგენტი ვიყავი მე გირგვლიანის საქმეში და იმავე მამალაძის საქმეში ჩანერგილი აგენტი. რომ პროვოკატორი ვარ და ინფორმაცია მიმქონდა ახალაიასთან. ეს ყველაფერი საჯაროდ თქვა, რითაც ცილი დამწამა და შესაბამისად მოსამართლემ, ირაკლი კოპალიანმა, რომელსაც ძალიან დიდ მადლობას ვუხდი, მიიღო სამართლიანი გადაწყვეტილება და დაავალდებულა ქორეპისკოპოს კონსტანტინე იაკობაშვილს ეს ყველაფერი საჯაროდ, ტელევიზიებით უარყოს და 1 ლარი სიმბოლური ჯარიმის გადახდაც დააკისრა“, - განაცხადა მიხეილ რამიშვილმა „ლიბერალთან“.