მთის საერთაშორისო დღესთან დაკავშირებით საქართველოს პრემიერ-მინისტრმა, მამუკა ბახტაძემ მაღალმთიანი რეგიონების განვითარების 2019-2023 წლების სტრატეგიის პრეზენტაცია გამართა.
მამუკა ბახტაძის თქმით, საქართველოში მთისა და მთის ხალხისადმი განსაკუთრებული დამოკიდებულება აქვთ. ისინი საქართველოს საზღვარს, ქართულ მიწას იცავენ და მთაში მცხოვრები თითოეული მოქალაქე საქართველოს ცოცხალი ფარია.
„მინდა, გითხრათ, რომ თქვენი ვაჟკაცობითა და ქედუხრელობით მთელი საქართველო ამაყობს. თქვენ ხართ მთელი საქართველოს იმედი. თქვენი აქ ყოფნით იცავთ ქართულ მიწას, საქართველოს საზღვარს. თითოეული მთაში მცხოვრები საქართველოს ცოცხალი ფარია. ეს თქვენი ისტორიული მისიაა, რომელსაც დღემდე ღირსეულად ასრულებთ, წინაპრების ტრადიციას აგრძელებთ და დარწმუნებული ვარ, ასევე გადასცემთ მომავალ თაობებს.
მთა საქართველოს ისტორიულ-კულტურული სიმდიდრეა და ჩვენი ვალია, მოვუფრთხილდეთ ამ ყველაზე დიდ სიმდიდრეს და დავიცვათ დაცარიელებისგან. ყველამ ვიცით, რა ძნელია მთის მკაცრ პირობებში ცხოვრება და ამიტომ თითოეული თქვენგანის ღვაწლი განსაკუთრებით დასაფასებელია. ჩვენ გვინდა, ცხოვრება შეგიმსუბუქოთ და ღირსეული პირობები შეგიქმნათ“, - თქვა მამუკა ბახტაძემ პრეზენტაციაზე.
მსოფლიოში მთის საერთაშორისო დღე 11 დეკემბერს აღინიშნება. ბახტაძის თქმით, საქართველო წელს პირველად უერთდება ამ დღეს და იმედოვნებს, რომ მისი აღნიშვნა ტრადიციად იქცევა