კომპანია „ვიზეარმა“ ბუდაპეშტში ახალი ტრენინგცენტრი ააშენა. გახსნის საზეიმო ღონისძიებაზე დასასწრებად ჟურნალისტები ყველა იმ ქვეყნიდან ჩავიდნენ, რომლებშიც ეს კომპანია ოპერირებს. კომპანიამ მედიას ახალი თვითმფრინავის მოდელი წარუდგინა, რომელიც უახლესი ტექნოლოგიებით იქნება აწყობილი. ახალი თვითმფრინავები, გარდა იმისა, რომ დიდი ზომისაა და შესაბამისად მეტ მგზავრს დაიტევს, ნაკლებ საწვავს საჭიროებს და, უფრო მეტად eco-friendly იქნება. კომპანიის წარმომადგენლების თქმით, მომავლის გეგმები ასეთია: არსებული თვითმფრინავები ახალი მოდელებით უნდა ჩანაცვლდეს და კომპანია ევროპის რამდენიმე ახალ ქალაქში უნდა შევიდეს. ამასთან, რაღა თქმა უნდა, ბაზარზე გაიზრდება კომპანიის წილი, რაც მეტი ადამიანის დასაქმების შესაძლებლობას იძლევა.
ცენტრის გახსნის ოფიციალური ნაწილის შემდეგ დადგა სიმულაციების დრო. ჟურნალისტებს რეალობასთან ძალიან მიახლოებული მანევრების გაკეთების საშუალება მიეცათ. ზუსტად ისეთის, როგორზეც დამწყები მფრინავები სწავლობენ.
ღონისძიების ბოლოს ჟურნალისტებს „ვიზეარის“ გენერალური დირექტორი - ჯოზეფ ვარადი შეხვდა. მისი თქმით, საქართველოში მოსახლეობის მხოლოდ 15% დაფრინავს და „ვიზეარის“ ყველაზე სერიოზული კონკურენტი თვითმფრინავის ალტერნატიული ტრანსპორტია - მატარებელი, ავოტბუსი, მანქანა. შესაბამისად, ამ ყველაფრის გათვალისწინებით მათი ბილეთის ფასებიც დაბალი უნდა იყოს. საწვავის ფასის ზრდა ავიაკომპანიებს დანახარჯს მკვეთრად უზრდის. თუმცა „ვიზეარს“ არ აქვს იმის “ფუფუნება”, რომ ეს ყველაფერი ბილეთის ფასზე ასახოს - ბილეთის ფასი არ უნდა გაიზარდოს. ამიტომ უნდა შემცირდეს დანახარჯები, რაც ძველის ახალი და ეკონომიური ტექნოლოგიებით ჩანაცვლების, აეროპორტებში პარკირების თანხის დაზოგვისა და მასშტაბის ეკონომიის ხარჯზე უნდა მოხდეს. ბატონი ვარადის თქმით, ეს და კიდევ სხვა პატარ-პატარა დეტალები საბოლოო ჯამში ქმნიან ჯაჭვს, რომელიც დანახარჯების შემცირებას ემსახურება.