პარლამენტის პლენარულ სხდომაზე „ნაციონალური მოძრაობის" წევრის, ნიკა მელიას სიტყვით გამოსვლის შემდეგ დეპუტატებს შორის ფიზიკური დაპირისპირება მოხდა. პლენარულ სხდომაზე დეპუტატები არჩევნების შედეგებს აფასებდნენ.
„პირდაპირ გეტყვით, მივესალმები ამ დარბაზში რამდენიმე კრიმინალს და არა „ქართული ოცნების“ დეპუტატს. პირდაპირ გეუბნებით, ყველას არ ეხება, მაგრამ ამ დარბაზში, დიახაც, მე ვხედავ რამდენიმე ჩვეულებრივ კრიმინალს. ერთი - ბატონი კობახიძე და მეორე - ბატონი ემზარ მკოიანი.
...ახლა თქვენმა დეპუტატმა, როდესაც დაიწყო საუბარი და მიესალმა საოცარ განვითარებას, პროგრესს ქვეყანაში და სალომე ზურაბიშვილის არჩევას დაარქვა დემოკრატიული პროცესის წარმოუდგენელი განვითარება, დიახაც, თქვენს სინდისზე არის როგორც მინიმუმ ერთი ადამიანის მკვლელობა ამ არჩევნების პროცესში. ეს ეხება ზუგდიდის ერთ-ერთი სკოლის დირექტორს. მეორე, ახალქალაქში უმოწყალო თავდასხმას გრიგოლ ვაშაძის შტაბზე, სადაც ოთხი ადამიანი იარაღის ტარებით უმოწყალოდ იყო ნაცემი და რას ბედავ შენ, ვიღაცა ხარ, გვარიც არ ვიცი შენი... ერთი ხმა მაინც თუ ამოგიღია და გითქვამს, ან დაგიგმია, როდესაც შენი გუნდის წევრები შენი კოლეგის, ემზარ მკოიანის მეთაურობით შეცვივდნენ გრიგოლ ვაშაძის შტაბში და გაუხეთქეს თავები და სახეები ადამიანებს. მესამე, დღეს, ვიდრე ასე თავს იწონებთ ვიღაცის წინაშე, ჩვენი ქვეყნის მოქალაქე სიკვდილს ებრძვის, ონის გაერთიანებული შტაბის ხელმძღვანელი. დიახაც, ეს არის სისხლიანი არჩევნები, რომელიც თქვენ ჩაატარეთ", - განაცხადა ნიკა მელიამ.
ნიკა მელიას შემდეგ სიტყვა მოითხოვა ირმა ინაშვილმა. „ხმა ჩაიკმინდე ახლა, გაჩუმდე და იჯექი მშვიდად", - მიმართა ინაშვილმა მელიას. შემდეგ ის მელიასთან მივიდა და ფურცლები შეაყარა.
„ერთხელ ჩხუბი ჯობია მე მგონი და მართლა უნდა დაგილეწოთ თავ-ყბა ყველას თქვენ. ეს მართლა კრიმინალები“, - განაცხადა ინაშვილმა ტრიბუნიდან და ნიკა მელიასკენ გაემართა - „გამოდი, აბა, გარეთ“.
