კავკასიის უნივერსიტეტში სტუდენტებთან შეხვედრისას საქართველოს პრეზიდენტმა, გიორგი მარგველაშვილმა მის წინამორბედებზე ისაუბრა. მისი თქმით, წინა პრეზიდენტების ისტორია ძალიან საინტერესო და ამავდროულად, ძალიან ტრაგიკულია. მარგველაშვილის შეფასებით, ჩვენ ვიწყებთ სახელმწიფოებრივ ბიოგრაფიას იმით, რომ ქართულმა საზოგადოებამ სასიკვდილოდ გაიმეტა ქვეყნის პირველი პრეზიდენტი.
მისი შეფასებით, საქართველოს პირველ პრეზიდენტს არც ადამიანები დაუცოხავს და არ კონცლაგერები შეუქმნია, თუმცა ის ქვეყნიდან გააძევეს და მოკლეს და არავის გასჩენია კითხვა - რატომ.
რაც შეეხება ედუარდ შევარდნაძეს, პრეზიდენტის შეფასებით, ის იყო მნიშვნელოვანი ბიოგრაფიის მატარებელი. მარგველაშვილის თქმით, შევარდნაძე მიუღებელ პოლიტიკურ ფიგურად „ნაციონალურმა მოძრაობამ“ წარმოაჩინა.
„ედუარდის დრო გინდათ? - ამ იდეოლოგიაში ვლაპარაკობთ. არავის არ უთქვამს, რომ ედუარდ შევარდნაძემ მას გეოპოლიტიკური შინაარსი და ადგილი მიუჩინა. შევარდნაძემ დაინახა, რომ დემოკრატია ის სპეციფიკა იქნება, რითიც საქართველო თავის თავს წარმოაჩენს“,- აღნიშნა მარგველაშვილმა.
რაც შეეხება მიხეილ სააკაშვილს, მან ქვეყნისთვის მნიშვნელოვანი რეფორმები გაატარა, რომელზეც საერთაშორისო საზოგადოება დღემდე საუბრობს. თუმცა, პრეზიდენტის თქმით, დღეს სააკაშვილის მიმართ სისხლის სამართლის დევნა მიმდინარეობს და ის ქვეყნიდან წასულია.
გიორგი მარგველაშვილის შეფასებით, მიუხედავად წინა პრეზიდენტთა მიერ გაკეთებული საქმისა, ყველა მათგანის ბედი ტრაგიკული იყო. მისი თქმით, თავისი მმართველობის პერიოდში ის წინამორბედთა გამოცდილებას ითვალისწინებდა.
„მე რა მელის, ამას მომავალში ვნახავთ“,- განაცხადა მარგველაშვილმა.