„ასე ირჩევა ხოლმე ქართული პოლიტიკური რეალობა - არსებობენ პორტირებული „ნაციონალები“, ვინც არიან „ქართულ ოცნებაში“; ექსპორტირებული „ნაციონალები“, რომლებიც არიან „ევროპულ საქართველოში“ და ჭეშმარიტი „ნაციონალები“, ვინც არიან „ნაციონალურ მოძრაობაში“. ეს პორტირებულები უყვებიან ექსპორტირებულებს, ჭეშმარიტებმა რა დააშავეს და ამას უყურებ როგორც პოლიტიკური დებატებს“, - განაცხადა საქართველოს პრეზიდენტმა, გიორგი მარგველაშვილმა კავკასიის უნივერსიტეტში სტუდენტებთან გამართულ შეხვედრაზე. 

მან საქართველოში ბოლო წლებში არსებულ არსებულ პოლიტიკურ ვითარებასა და ტენდენციებზე ისაუბრა. მარგველაშვილის განმარტებით, როდესაც ხელისუფლებაში „ქართული ოცნება“ მოვიდა, მაშინ პოლიტიკური სპექტრი ორად იყო გაყოფილი - მკვეთრად გამოხატული ოპოზიციური გაერთიანება, ანუ ბიძინა ივანიშვილი და მის ირგვლივ გაერთიანებული პოლიტიკური ძალები და „ნაციონალური მოძრაობა“. თუმცა, მისი შეფასებით, წლების შემდეგ „ქართულ ოცნებაში“, ერთეული გამონაკლისების გარდა, არ დარჩნენ პოლიტიკური ლიდერები, რომლებსაც ოპოზიციური გამოცდილება ჰქონდათ. 

პრეზიდენტის თქმით, 2016 წლისთვის „ნაციონალურ მოძრაობასთან“ დაპირისპირებულმა პოლიტიკურმა ლიდერებმა და კოალიციამ, არსებობა შეწყვიტეს და ახალ პოლიტიკურ გაერთიანებად ჩამოყალიბდნენ. თუმცა, მარგველაშვილის განმარტებით, ის პოლიტიკური თვალსაზრისით დაპირისპირებას ნაკლებად ხედავს.

„ვხედავ ინდივიდებს, რომლებიც არიან პორტირებულები, ექსპორტირებულები და ჭეშმარიტები. ჭეშმარიტები „ნაციონალური მოძრაობის“ წევრები გახდნენ უკვე „ნაციონალური მოძრაობის“ წაგების შემდეგ. ასე რომ, ისეთი ბოლომდე გაუგებარი პროცესია, რომ ამას არ ჰქვია პოლიტიკური დაპირისპირება, ამას ჰქვია პიროვნული თამაშები”,- განაცხადა გიორგი მარგველაშვილმა.