საქართველოს პარლამენტის თავმჯდომარის ირაკლი კობახიძის თქმით, არ შეიძლება, ჩვენი პრეზიდენტი იყოს ასჯერ მოწყალე, ვიდრე აშშ-ის ან რომელიმე ევროპული ქვეყნის პრეზიდენტი. გიორგი მარგველაშვილის შეწყალების პრაქტიკა დასავლურ სტანდარტებს აცდენილი იყო და სალომე ზურაბიშვილი ამას გამოასწორებს.
„რაც შეეხება ბოლო აქტს, ეს არის მისი გადასაწყვეტი. თუმცა, ჩვენ ვსაუბრობდით იმაზე, რომ პრეზიდენტის მიერ შეწყალების პრაქტიკა მთლიანად იყო აცდენილი დასავლურ გამოცდილებას. დაახლოებით ასჯერ მეტი იყო სტატისტიკა შეწყალების კუთხით.
რაც თავისთავად მეტყველებს იმაზე, რომ რაღაც იყო არასწორი ამ პრაქტიკაში. არ შეიძლება საქართველოს პრეზიდენტი იყოს ასჯერ მოწყალე, ვიდრე აშშ-ის ან რომელიმე ევროპული ქვეყნის პრეზიდენტი.
აქედან გამომდინარე იყო სერიოზული ხარვეზები, რაც გადახედვას საჭიროებს და მე ვფიქრობ, რომ შეწყალების პრაქტიკას ახალი პრეზიდენტი მოიყვანს დასავლურ სტანდარტებთან შესაბამისობაში“, - თქვა ირაკლი კობახიძემ.
გიორგი მარგველაშვილს პრეზიდენტობის მის ვადაში შეწყალების ბოლო აქტი უნდა გამოეცა.
შეწყალების კომისიის ბოლო სხდომა ამ კვირაში უნდა ჩატარებულიყო. თუმცა, მხოლოდ ერთი მოსამზადებელი შეხვედრა გაიმართა. „ლიბერალმა“ 12 დეკემბერს შეკითხვით მიმართა პრეზიდენტის ადმინისტრაციას - აპირებს თუ არა პრეზიდენტი მარგველაშვილი შეწყალების აქტის გამოცემას. ადმინისტრაციაში ამ საკითხზე კომენტარს არ აკეთებენ.
ომბუდსმენის თქმით, რომელიც კომისიის წევრია, პრეზიდენტი, სავარაუდოდ, აღარ გეგმავს მორიგ შეწყალებას.
„პრეზიდენტის უფლებამოსილების ვადის ამოწურვამდე, სავარაუდოდ, კომისიის სხდომა არ შედგება. სხდომები ამ კვირაში იყო ჩანიშნული, მაგრამ ალბათ, არ შედგა იმის გამო, რომ პრეზიდენტი, სავარაუდოდ, აღარ გეგმავს მორიგ შეწყალებას“, - თქვა ნინო ლომჯარიამ.