სათემო რადიოს „რადიო მარნეულის“ ინფორმაციით, ყოფილი მერი თეიმურაზ აბაზოვი პატიმრობიდან გაათავისუფლეს. ინფორმაცია ამის შესახებ აბაზოვის მეგობარმა სოციალურ ქსელში გამოაქვეყნა. 

ინფორმაცია ამის შესახებ „ლიბერალს“ პროკურატურაში დაუდასტურეს. კერძოდ მოსამართლემ აბაზოვს აღკვეთის ღონისძიება, პატიმრობა, 10 000 ლარის გირაოთი შეუცვალა. 

„დაცვის მხარის პოზიციით, მოწმეები უკვე დაკითხულები არიან, მათზე გავლენის მოხდენის საშიშროება აღარ არსებობს და ამიტომ მოსამართლემ ადვოკატის შუამდგომლობა დააკმაყოფილა. საქმის არსებით განხილვა გრძელდება" - ამბობენ პროკურატურაში. 

მას სექტემბერში ბრალი 157-ე პრიმა პირველი და მეორე მუხლებით დაუმძიმდა, რაც გულისხმობს პირადი ცხოვრების ამსახველი ინფორმაციის ან პერსონალური მონაცემების ხელყოფას. თემურ აბაზოვი არაადამიანური და დამამცირებელი მოპყრობის ბრალდებით 13 ივნისს დააკავეს. 14 ივნისს სასამართლომ აღკვეთი ღონისძიების სახით მას პატიმრობა შეუფარდა.

 პროკურატურის ინფორმაციით, მარნეულის მერმა, თემურ აბაზოვმა ელჩინ ალახვერდიევს შეაფურთხა სახეში და მიაყენა ფიზიკური შეურაცხყოფა, შემდეგ აიძულა, ჩართულიყო ფეისბუქის პირდაპირ ეთერში, მოეხადა ბოდიში და სიტყვიერი შეურაცხყოფა მიეყენებინა თავისი ცოლისთვის, ბოლოს კი მარნეულის მუნიციპალიტეტის მერმა, თემურ აბაზოვმა ძალადობით, ღირსების შელახვის მუქარით, ელჩინ ალახვერდიევი აიძულა მოეშარდა ჭიქაში და შარდით მოებანა სახე.