ტყიბულის შახტის ადმინისტრაციის 6 დაკავებულ თანამშრომელს აღკვეთის ღონისძიება - პატიმრობა 5 000 - 5 000-ლარიანი გირაოთი შეეცვალა. როგორც „ლიბერალთან" საუბრისას დაცვის მხარის ადვოკატი მამუკა ჭაბაშვილი ამბობს, ექვსივე მათგანი დანაშაულს აღიარებს. 

„გუშინ მეექვსემაც აღიარა და უდავოდ გახადა ყველა მტკიცებულება. შესაბამისად, თუ მტკიცებულებებს არ იკვლევ და მოწმეებსაც არ კითხავ, ერთადერთი საფრთხე რის გამოც მოსამართლემ თავის დროზე პატიმრობა შეუფარდა მათ, ეს იყო მოწმეებზე ზემოქმედება და არა მიმალვა და ა.შ. აქედან გამომდინარე, რადგან აღარ ვკითხავთ მოწმეებს, ეს როგორც ახალი გარემოება, საფუძველი იყო იმისა, რომ მოსამართლეს გადაეხედა აღკვეთის ღონისძიებისთვის და გირაო შეუფარდა", - ამბობს ჭაბაშვილი.

მისი თქმით, შემდგომი სასამართლო პროცესი 12 თებერვალს ჩაინიშნა და მოსამართლის გადაწყვეტილება საქმეზე სავარაუდოდ ამავე პროცესზე გახდება ცნობილი.

---------------------------------------------

შახტის ადმინისტრაციის 6 თანამშრომელი აგვისტოში დააკავეს. ესენი არიან: მინდელის სახელობის შახტის დირექტორი, ამავე შახტის მთავარი ინჟინერი, შახტის მენეჯერი, N1 ნახშირმოპოვებითი უბნის უფროსი, ამავე უბნის უფროსის მოადგილე და უფროსის თანაშემწე; 

გამოძიების პოზიციით, დაკავებული პირების მიერ დარღვეულ იქნა „ნახშირის შახტების უსაფრთხოების შესახებ ტექნიკური რეგლამენტის“ მოთხოვნები, რომლის თანახმად, აკრძალულია იმ შახტებში მუშაობა, სადაც დარღვეულია უსაფრთხოების წესები.

„მიუხედავად იმისა, რომ დაკავებული პირებისთვის ცნობილი იყო მინდელის სახელობის შახტში უსაფრთხოების წესების დარღვევის შესახებ, კერძოდ, მათთვის ცნობილი იყო, რომ ტექნიკური რეგლამენტის მოთხოვნების შესაბამისად, შახტში ჭერი არ იყო გამაგრებული და ხელოვნურად ჩამოშლილი, 2018 წლის თებერვალში დაიწყო სამთო სამუშაოების წარმოება", - ნათქვამია შსს-ს განცხადებაში.

5 აპრილს, დაახლოებით, 03:30 საათზე, ქვანახშირის მოპოვებითი სამუშაოების წარმოების დროს მოხდა აფეთქება, რის შედეგადაც ჭერი ჩამოინგრა და მიღებული მრავლობითი დაზიანებების გამო გარდაიცვალა შახტის 6 თანამშრომელი, ხოლო ჯანმრთელობის დაზიანებები მიიღო ორმა მეშახტემ.