რუსთაველის გამზირზე, პარლამენტის შენობის წინ ენმ-ის ლიდერები და მათი მხარდამჭერები კარვებს შლიან. მოქალაქეების ნაწილი სოფელ ველისციხეში განვითარებული მოვლენების გაპროტესტებას აპირებს. როგორც „ერთიანი ნაციონალური მოძრაობის" წევრმა ლევან ხაბეიშვილმა განაცხადა, საპროტესტო აქციის მონაწილეები დღეს არ დაიშლებიან.
„დღეს ჩვენ არსად წასვლას არ ვაპირებთ. ვაპირებ აქ დავრჩე ჩემს მეგობრებთან ერთად. რამდენიმე ათეული კარავი გვაქვს, რომლებსაც გავშლით აქ და გავაგრძელებთ პროტესტს."- განაცხადა ლევან ხაბეიშვილმა.
"ერთიანი ნაციონალური მოძრაობის" ლიდერის გიორგი ვაშაძის თქმით, ისინი მხარდამჭერებთან ერთად კახეთიდან თბილისში მოემართებიან. მისი თქმით, რუსთაველზე თანაგუნდელებს შეუერთდებიან, რომლებმაც უკვე დაიწყეს პარლამენტის შენობის წინ კარვების გაშლა.
დღეს ოპოზიციის ლიდერებმა და მათმა მხარდაჭერებმა თელავში ჩასვლა ვერ შეძლეს. ისინი იქ ინავგურაციის პარალელურად აქციის გამართვას გეგმავდნენ. ლიდერების თქმით, მათ თელავისკენ მიმავალი გზა გადაკეტილი დახვდათ და პოლიციისგან ცენტრალური გზის გახსნას ითხოვნდნენ, რასაც დაპირისპირება მოჰყვა მხარდამჭერებსა და სამართალდამცავებს შორის.
შს სამინისტროს განცხადებით, უწყება მათ თელავში ჩასასვლელად ალტერნატიულ გზას სთავაზობდა და ცენტრალური გზის გადაკეტვის მიზეზად საგზაო უსაფრთხოება დასახელდა.