პარლამენტის საპროცედურო საკითხთა და წესების კომიტეტის თავმჯდომარე გიორგი კახიანი არ იზიარებს მოსაზრებას იმის შესახებ, რომ სალომე ზურაბიშვილი ამ წუთისთვის კონსტიტუციას არღვევს.
როგორც იურისტმა ლევან ალაფიშვილმა „კომერსანტს" განუცხადა, „სალომე ზურაბიშვილი დღესაც გახლავთ პარლამენტის დიასპორისა და კავკასიის საკითხთა კომიტეტის თავმჯდომარის პირველი მოადგილე და მთაწმინდის მაჟორიტარი დეპუტატი. ის ამავდროულად საქართველოს პრეზიდენტია. ამას კი კრძალავს საქართველოს კონსტიტუცია".
კახიანმა „ლიბერალთან" საუბრისას განმარტა, რომ პარლამენტის წევრის მიერ სხვა თანამდებობის დაკავების შემთხვევაში, პარლამენტისთვის განცხადებით მიმართვა საჭირო არ არის.
„როდესაც იგი პარლამენტის წევრთან შეუთავსებელ თანამდებობას იკავებს, ავტომატურად, პროცედურით დადგენილი მექანიზმებით უწყდება მას უფლებამოსილება. ვინაიდან სალომე ზურაბიშვილი ფიცის დადების მომენტიდან საქართველოს პრეზიდენტია, ეს პროცედურა დაიწყო. უახლოეს დღეებში ჩატარდება პარლამენტის საპროცედურო საკითხთა და წესების კომიტეტის სხდომა, რის შემდეგაც კომიტეტი პლენარულ სხდომას დასკვნით მიმართავს. უახლოეს პლენარულ სხდომაზე სალომე ზურაბიშვილს უფლებამოსილება შეუწყდება. ეს არის რეგლამენტით გათვალისწინებული პროცედურა, ასეთი რამ ამ და სხვა მოწვევის პარლამენტშიც არაერთხელ ყოფილა. პარლამენტის წევრის სტატუსისთვის შეუთავსებელია ნებისმიერი სხვა თანამდებობა, ასეთ დროს პარლამენტი პროცედურის მიხედვით მოქმედებს და პარლამენტარს უწყეტს უფლებამოსილებას", - აცხადებს კახიანი.
