„არაერთხელ მომხდარა დაბრალება, რომ სუსი უთვალთვალებთ" - ამ სიტყვებით გამოეხმაურა სახელმწიფო უსაფრთხოების სამსახურის უფროსი ვახტანგ გომელაური ენმ-ის ერთ-ერთი ლიდერის, ნიკა მელიას ბრალდებებს, რომ დავით კირკიტაძეს დაკავებამდე სუს-ის თანამშრომლები უთვალთვალებდნენ.

„არანაირი საგანგებო რეჟიმი არ არის. ბატონმა მელიამ განაცხადა, რომ ისინი იყვნენ სუსის თანამშრომლები, თუმცა პოლიციის თანამშრომლები არიან და ეს მათმა ხელძღვანელმაც თქვა. ჩვენ ამ საკითხში (კირკიტაძის დაკავება) ჩართულები არ ვყოფილვართ. ეს არის სრული აბსურდი. არაერთხელ მომხდარა დაბრალება, რომ სუსი უთვალთვალებთ, თუმცა არცერთი ამის დამადასტურებელი ფაქტი არ დაუდიათ" - გომელაურის კომენტარს „იმედინიუსი" ავრცელებს. 

გუშინ „ნაციონალური მოძრაობის“ წევრი დავით კირკიტაძე პოლიციელებმა დააკავეს. შსს-ს ცნობით, კახეთის პოლიციის დეპარტამენტში 16 დეკემბერს, ველისციხეში გამართულ აქციაზე სამართალდამცველზე თავდასხმის ფაქტზე გამოძიება საქართველოს სსკ-ს 353-ე პრიმა მუხლის 1-ლი ნაწილით დაიწყო, რაც პოლიციის მიმართ მისი საქმიანობის შეწყვეტის მიზნით წინააღმდეგობას და ძალადობას გულისხმობს.

დავით კირკიტაძის ადვოკატმა გიორგი კონდახაშვილმა კახეთის სამხარეო სამმართველოდან გამოსვლის შემდეგ ჟურნალისტებს განუცხადა, რომ კირკიტაძე ბრალს არ აღიარებს და შიმშილობას იწყებს.