გურჯაანის რაიონული სასამართლო „ერთიანი ნაციონალური მოძრაობის" წევრისთვის, დავით კირკიტაძისთვის აღკვეთის ღონისძიების შეფარდების საკითხზე ხვალ 10:30 საათზე იმსჯელებს. 

გაერთიანებული ოპოზიციის წარმომადგენლები, რომლებიც სასამართლოსთან დღეს იყვნენ შეკრებილი, ამბობენ, რომ ხვალ დილიდან ისევ სასამართლოს შენობასთან გამოცხადდებიან და აღკვეთის ღონისძიებად კირკიტაძისთვის პატიმრობის შეფარდების შემთხვევაში საპროტესტო აქციებს გამართავენ. 

17 დეკემბერს პოლიციელებმა „ნაციონალური მოძრაობის“ წევრი დავით კირკიტაძე დააკავეს. შსს-ს ცნობით, კახეთის პოლიციის დეპარტამენტში 16 დეკემბერს, ველისციხეში გამართულ აქციაზე სამართალდამცველზე თავდასხმის ფაქტზე გამოძიება საქართველოს სსკ-ს 353-ე პრიმა მუხლის 1-ლი ნაწილით დაიწყო, რაც პოლიციის მიმართ მისი საქმიანობის შეწყვეტის მიზნით წინააღმდეგობას და ძალადობას გულისხმობს.