აშშ-ის თავდაცვის მინისტრი ჯეიმს მატისი თანამდებობიდან გადადგა. მინისტრმა გადადგომის შესახებ განცხადება მას შემდეგ დაწერა, რაც აშშ-ის პრეზიდენტმა დონალდ ტრამპმა  განაცხდა, რომ ის სირიიდან  ჯარების გაყვანას აპირებს. მინისტრი პრეზიდენტის ამ გადაწყვეტილებას ეწინააღმდეგება. 

როგორც BBC  წერს,  გადადგომის შესახებ წერილში გენერალმა მკაცრად აღნიშნა,  რომ უმჯობესი იქნება, თუ ტრამპი ამ თანამდებობაზე დანიშნავს იმ პირს, რომლის პოლიტიკური ხედვაც თანხვედრაში იქნება პრეზიდენტის ხედვასთან. 

68 წლის ჯეიმს მატისი თანამდებობას თებერვალში დატოვებს. 

კონგრესის წევრები ჯეიმს მატისის ამ გადაწყვეტილებას გამოეხმაურნენ. როგორც ისინი აღნიშნავდნენ, მატისის გადადგომა მათთვის შოკისმომგვრელი იყო. 

მიუხედავად იმისა, რომ გენერალი წერილში უშუალოდ სირიიდან ჯარების გაყვანის შესახებ არ საუბრობს, ის ადრე აცხადებდა, რომ სირიიდან ჯარის გაყვანა იქნებოდა „სტრატეგიული შეცდომა“. 

ასევე, აღმოჩნდა, რომ გენერალი პრეზიდენტს არ ეთანხმებოდა NATO-სა და რუსეთთან მიმართებაშიც. 

_______________

რამდენიმე დღის წინ გავრცელდა ინფორმაცია, რომ აშშ სირიიდან ჯარების გაყვანისთვის ემზადება. 

პრეზიდენტი დონალდ ტრამპმა Twitter-ზე დაწერა: ჩვენ დავამარცხეთ ISIS სირიაში, იქ ყოფნის ერთადერთი მიზეზიც ეს იყო. 

ხელისუფლების წარმომადგენლების განაცხადებით, სირიაში იმყოფება აშშ-ის 2000-კაციანი სახმელეთო ჯარი.