ველისციხის ინციდენტში მონაწილე პირებს გურჯაანის რაიონულმა სასამართლომ აღკვეთის ღონისძიებად პატიმრობა შეუფარდა. დაკავებულებს პროკურატურა გაერთიანებული ოპოზიციის აქტივისტის, შოთა დალაქიშვილის ცემას ედავება.

აღნიშნული პირები 16 დეკემბერს კახეთში, სოფელ ველისციხეში ოპოზიციის მხარდამჭერზე ძალადობის ბრალდებით დააკავეს.

უწყების განმარტებით, ჩატარებული საგამოძიებო მოქმედებებით და ოპოზიციური პარტიის მხარდამჭერის, შ.დ.-ს გამოკითხვით გაირკვა, რომ მას 16 დეკემბერს სოფელ ველისციხეში ფიზიკური შეურაცხყოფა ადგილობრივმა მცხოვრებლებმა მიაყენეს.

„პოლიციის მიერ გატარებული კომპლექსური ოპერატიულ-სამძებრო ღონისძიებების შედეგად, საქმეში არსებული მტკიცებულებების საფუძველზე ქ. გურჯაანში დაკავებული არიან შ.დ.-ზე ძალადობაში მონაწილე პირები: 1967 წელს დაბადებული გ.მ. და 1971 წელს დაბადებული მ.უ., რომლებიც აღიარებენ ჩადენილ დანაშაულს“, - აცხადებენ შსს-ში.

გამოძიება სისხლის სამართლის კოდექსის 126-ე მუხლის პირველი ნაწილით მიმდინარეობს, რაც ცემას ან სხვაგვარ ძალადობას გულისხმობს და ისჯება ჯარიმით ან საზოგადოებისათვის სასარგებლო შრომით ვადით 120-დან 180 საათამდე ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ერთ წლამდე. უწყების ინფორმაციით, სისხლის სამართლის საქმესთან დაკავშირებული სხვა პირების დადგენა-დაკავების მიზნით, ინტენსიურ რეჟიმში ტარდება შესაბამისი ოპერატიულ-სამძებრო და საგამოძიებო მოქმედებები.