ფრაქცია „ქართული ოცნება - ძლიერი საქართველოსთვის“ წევრი ლევან გოგიჩაიშვილი პარლამენტში ფრაქციის სხდომაზე იწვევს იუსტიციის უმაღლესი საბჭოს იმ წევრებს, რომლებმაც უზენაესი სასამართლოს მოსამართლეობის კანდიდატების პარლამენტში წარდგენას მხარი არ დაუჭირეს.
როგორც ბიუროს დღევანდელ სხდომაზე ლევან გოგიჩაიშვილმა განაცხადა, იუსტიციის უმაღლესი საბჭოდან მოსამართლეობის კანდიდატების სია პარლამენტში ისე შევიდა, რომ თავად საბჭოში არანაირი მსჯელობა არ ყოფილა. მისი თქმით, არის ფორსირებული პროცესი, პარლამენტში არ შესულა ბიოგრაფიები და დეპუტატებს კანდიდატების შესახებ არანაირი ინფორმაცია არ აქვთ.
„ჩვენმა ფრაქციამ გადაწყვიტა, რომ 27 დეკემბერს, 14:00 საათზე იუსტიციის საბჭოს ის წევრები მოიწვიოს, ვინც ამ კანდიდატებს მხარი არ დაუჭირეს. შესაბამისად, იქიდან გამომდინარე, რომ ჩვენ აქამდე არ გვქონია ინფორმაცია იუსტიციის საბჭოდან, მათ ვთხოვთ, გაგვაცნონ ინფორმაცია, რა პროცესებთან გვქონდა საქმე, რა პროცედურა იყო, როგორ შეირჩა ეს ადამიანები. შეხვედრა ღია იქნება“, - აცხადებს ლევან გოგიჩაიშვილი.
24 დეკემბერს საბჭომ პარლამენტს პროცედურების შემუშავების გარეშე შემდეგი კანდიდატურები წარუდგინა: თამარ ალანია, მერაბ გაბინაშვილი, დიმიტრი გვრიტიშვილი, გიორგი მიქაუტაძე, ნინო სანდოძე, პაატა სილაგაზე, გიორგი ტყავაძე, ნინო ქადაგიძე, მიხეილ ჩინჩალაძე, მარიამ ცისკაძე.
აღნიშნული კანდიდატებისთვის ხმა არ მიუციათ იუსტიციის უმაღლესი საბჭოს წევრებს: ნაზი ჯანეზაშვილს, ანა დოლიძეს და ირმა გელაშვილს.
ლევან გოგიჩაიშვილის მოწვევას მიესალმა ნაზი ჯანეზაშვილი. „მზად ვარ ნებისმიერ დაინტერესებულ პირს შევხვდე, გავაცნო ჩემი მოსაზრებები და ხედვა ამ პროცესთან დაკავშირებით, ასევე ისიც, რატომ არ უნდა აირჩიოს პარლამენტმა ჩინჩალაძე და მისი კლანის მოსამართლეები. რატომ უნდა გაიხსნას უზენაესი სასამართლოს კარი მხოლოდ ღირსეულებისთვის!" - წერს ჯანეზაშვილი Facebook-ზე.
