ირაკლი კობახიძემ პარლამენტში მედიასთან საგანგებო განცხადება გააკეთა. მისი თქმით, პარლამენტს უკვე გაცხადებული ჰქონდა, რომ ამ ეტაპზე უზენაესის მოსამართლეების სიასთან დაკავშირებით განხილვებს აჩერებდა. შესაბამისად, მისი თქმით, გაუგებარია, რატომ დაუკავშირა ეკა ბესელიამ გადადგომა უზენაესის მოსამართლეების არჩევის პროცესს.
ეკა ბესელიამ დღეს იურიდიული კომიტეტის თავმჯდომარის პოსტის გადადგომის შესახებ გააკეთა განცხადება. მისი თქმით, მისი გადადგომით, უზენაესი სასამართლოს მოსამართლეების უვადოდ დანიშვნის გაუმართლებელი პროცესი შეჩერდა.
"ჩვენ გვქონდა ამ საკითხის განხილვა საპარლამენტო ფორმატში. პარტიულ ფორმატში შედგა შეხვედრები უმრავლესობის წარმომადგენლებთან, რომელსაც პარტიის თავჯდომარე ესწრებოდა, სადაც განხილული იყო როგორც პროცედურა, ისე საუბარი იყო კანდიდატებზე. მე გავაკეთე განცხადება, რომ წელს აღარ ვიღებდი გადაწყვეტილებას იმის თაობაზე, თუ ვინ უნდა ყოფილიყო უზენაესის მოსამართლე. ჩემთვის გაუგებარია ეკას ბესელიას განცხადების შინაარსი, რატომ დაუკავშირა გადადგომა ამ ყველაფერს, ლოგიკური საფუძველი არ ჩანს", - განაცხადა ირაკლი კობახიძემ.
იგივე შინაარსის განცხადება გააკეთა სოფო კილაძემ იურიდიულ საკითხთა კომიტეტის სხდომაზე, სადაც განაცხადა, რომ ბესელიას გადადგომასა და უზენაესი სასამართლოს მოსამართლეების საკითხს შორის კავშირს ვერ ხედავს.
