სოციალურ ქსელში გავრცელდა მეტროსადგურ „ავლაბარში“ მიმდინარე სარეაბილიტაციო სამუშაოების ამსახველი ფოტოები. მოქალაქეები აღნიშნავენ, რომ მარმარილოს ფილების ნაცვლად სადგურში ბაქანს მეტლახით აპირკეთებენ.
„ლიბერალი“ დაუკავშირდა თბილისის სატრანსპორტო კომპანიას, სადაც განაცხადეს, რომ ფოტოებზე ასახულია კერამოგრანიტის ფილები და არა მეტლახი. მათი თქმით, აღნიშნულ ადგილზე იყო პლასტიკატი, აალებადი ნივთიერება, რომელიც, უსაფრთხოების ზომებიდან გამომდინარე, უნდა შეცვლილიყო.
„თავიდანვე, ჯერ კიდევ კომუნისტების დროს მეტროსადგურ „ავლაბარში“ ბაქანზე არ ყოფილა გაკრული მარმარილო, არამედ იყო კერამოგრანიტის ფილა. შემდგომ მას ჩაუტარდა რეაბილიტაცია და დაიფარა პლასტიკატით. სახანძრო უსაფრთხოებიდან გამომდინარე, აუცილებელია, სადგური გათავისუფლდეს პლასტიკატისგან. რეაბილიტაციის ფარგლებში, ყველა მეტროსადგურში ჩამოიხსნება აალებადი ნივთიერება“, - განუცხადეს „ლიბერალს“ სატრანსპორტო კომპანიიდან.
მათი თქმით, პლასტიკატის ჩამოხსნისას მის ქვეშ დარჩენილი ძველი, დაზიანეული კერამოგრანიტის ფილებიც ჩამოიხსნა.
„ახლა იკვრება ახალი კერამოგრანიტი, როგორც ეს ხელშეკრულებით იყო გათვალისწინებული. ეს არ არის მეტლახი, როგორც ავრცელებენ ინფორმაციას“, - განაცხადეს თბილისის სატრანსპორტო კომპანიაში.
ასევე, აღნიშნეს, რომ სადგურში ის მონაკვეთები, რომელიც მარმარილოთია მოპირკეთებული, იმ შემთხვევაში, თუ დაზიანებულია ჩამოიხსნება და ჩანაცვლდება მარმარილოს ახალი ფილებით.
ფოტო: ირაკლი ორაგველიძე