შერიგებისა და სამოქალაქო თანასწორობის საკითხებში სახელმწიფო მინისტრ ქეთევან ციხელაშვილის განცხადებით, აბსოლუტურად მიუღებელია საოკუპაციო რეჟიმის გადაწყვეტილება, რომლის თანახმადაც, უკვე მე-12 დღეა, ოკუპირებულ აფხაზეთსა და ცხინვალში ე.წ. გამშვები პუნქტები ჩაკეტილია.
„უკვე მე-12 დღეა, რაც აფხაზეთისა და ცხინვალის რეგიონის მოსახლეობა, ფაქტობრივად, სრულ იზოლაციაშია. განსაკუთრებით მძიმე, კატასტროფულ მდგომარეობაშია მოსახლეობა ცხინვალის რეგიონში, სადაც დაკეტილია გადაადგილება დიდთოვლობის გამო, და შესაბამისად, არის საკვებზე წვდომის ძალიან რეალური პრობლემა.
მე მინდა გითხრათ, რომ ე. წ. გამშვებ პუნქტებზე შეზღუდვების დაწესების დღიდან, ჩვენ 24-საათიან რეჟიმში ვმუშაობთ იმაზე, რომ პარტნიორებთან ერთად მოვაგვაროთ ეს პრობლემა. ე. წ. გადასასვლელი პუნქტების ჩაკეტვას არანაირი გამართლება არ აქვს, თითქოს რაღაც არარსებულ ეპიდემიაზე აპელირებით. მდგომარეობა ეპიდემიური არ არის. ამიტომ, ეს არ არის ადეკვატური საბაბი, რომ მოსახლეობას სასიცოცხლოდ მნიშვნელოვანი საჭიროებებიდან გამომდინარე პრობლემები შეექმნას. მე კიდევ ერთხელ მივმართავ ყველას, რომ გადაიხედოს ეს არა მხოლოდ უკანონო, არამედ არაჰუმანური გადაწყვეტილება. შეთავაზებულია ყველა გზა და გამოსავალი, რომ ამ პრობლემას მივხედოთ. მოსახლეობას რეალურად აქვს საკვებ პროდუქტებზე წვდომის პრობლემა", - განაცხადა მინისტრმა.