გვიან ღამით, გეგა გეგეშიძის მხარდასაჭერად დიღომში, პოლიციის შენობასთან აქცია გაიმართა. „პირველი არხის“ ცნობით, პოლიციის მთავარ სამმართველოსთან შეკრებილი მოჭიდავეები ჭიდაობის ფედერაციის პრეზიდენტ გეგა გეგეშიძის გათავისუფლებას ითხოვდნენ. 

„პირველ რიგში, სამწუხარო ფაქტი მოხდა, მოჭიდავე კაცმა მოჭიდავე ადამიანი ამ დონემდე მიიყვანა. აქ მოვედით, შევიკრიბეთ და მხარდაჭერას უცხადებთ ჩვენი ნაკრების მწვრთნელს. ვისაც ეს საქმე ეხება, ვთხოვთ, რომ გეგა გეგეშიძე დროულად იყოს გათავისუფლებული, რათა ეს სპორტსმენები დარბაზებს დაუბრუნდნენ და გააგრძელონ თავისი საქმე, ვარჯიში“, – განაცხადა „პირველი არხის“ ცნობით, თავისუფალი სტილით მოჭიდავეთა ნაკრების მთავარმა მწვრთნელმა გიორგი იანტბელიძემ.

ჭიდაობის ფედერაციის პრეზიდენტი დააკავეს

შინაგან საქმეთა სამინსიტრომ, საქართველოს ჭიდაობის ფედერაციის პრეზიდენტი 
თამაზ (გეგა) გეგეშიძე, სპორტის სასახლეში მომხდარ ფაქტთან დაკავშირებით, 
სისხლის სამართლის კოდექსის 126-ე მუხლის 1-ლი ნაწილით დააკავა, რაც 
ძალადობას გულისხმობს.

"შინაგან საქმეთა სამინისტრომ, საქმის ფაქტობრივი გარემოებების დასადგენად 
აქტიური საგამოძიებო მოქმედებები ჩაატარა. ასევე, ინფორმაციის 
ნებაყოფლობით მოწოდებაზე უარის თქმის გამო, კონფლიქტის შემსწრე პირები 
დაიკითხნენ მაგისტრატ მოსამართლესთან.
გამოძიებით დადგინდა, რომ მიმდინარე წლის 11 იანვარს, სპორტის სასახლეში 
მომხდარი დაპირისპირებისას, თამაზ გეგეშიძემ ფიზიკური შეურაცხყოფა მიაყენა 
სპორტსმენ ზურაბ დათუნაშვილს.

შინაგან საქმეთა სამინისტროში სპორტის სასახლეში მომხდარ ფაქტთან 
დაკავშირებით, გამოძიება საქართველოს სისხლის სამართლის კოდექსის 126-ე და 
239-ე მუხლებით გრძელდება." - ნათქვამია განცხადებაში.

ფოტო: popsport