ხვალ, 27 იანვარს უზენაესი სასამართლოს მოსამართლეების შერჩევის პროცედურების განსახილველად სამუშაო ჯგუფის შეხვედრა გაიმართება. შეხვედრის მონაწილეები უზენაესი სასამართლოს მოსამართლეობის კანდიდატების დასახელების პროცედურასა და კრიტერიუმებზე იმსჯელებენ. სამუშაო ჯგუფში შედიან: საპარლამენტო უმრავლესობის, იურიდიულ საკითხთა კომიტეტის და იუსტიციის უმაღლესი საბჭოს წევრები.
შეხვედრის პარალელურად კი მოქალაქეთა საინიციატივო ჯგუფი საპროტესო აქციას გამართავს და გააჟღერებს სასამართლოს ძირეული ცვლილების მოთხოვნას.
„აქციის მონაწილეების მთავარი მოთხოვნაა, იუსტიციის უმაღლესი საბჭოს 11-მა წევრმა, რომლებმაც მხარი დაუჭირეს ლევან მურუსიძის უვადოდ დანიშვნას და ხმა მისცეს უზენაესი სასამართლოს მოსამართლეთა კანდიდატების სიას, დატოვონ თანამდებობა. ასევე თანამდებობებიდან გადადგნენ სასამართლოში არსებული კლანის ლიდერები და წლების განმავლობაში, უსამართლო მართლმსაჯულების შემოქმედი მოსამართლეები, მიხეილ ჩინჩალაძე და ლევან მურუსიძე", - ნათქვამია განცხადებაში.
მოქალაქეთა საინიციატივო ჯგუფის აქცია ხვალ, 10 საათზე სასტუმრო „რედისონის" წინ დაიწყება, სადაც 11 საათზე სამუშაო შეხვედრა გაიმართება.
