NDI-ის კვლევის თანახმად, შეკითხვაზე, ხვალ რომ საპარლამენტო არჩევნები ტარდებოდეს, რომელ პარტიას/გაერთიანებას მისცემდით ხმას? - ყველაზე მეტი, 27% პასუხობს, რომ არ იცის, 24% „ქართულ ოცნებას“ ასახელებს, 14% - არც ერთი პარტია, 14% - უარი პასუხზე, 11% - „ერთიანი ნაციონალური მოძრაობა“; 3% - პატრიოტთა ალიანსი; 8% - სხვა.
გამოკითხულთა 23% არასდროს მისცემდა ხმას „ერთიან ნაციონალურ მოძრაობას“; 11% - „ქართულ ოცნებას“; 7% - „პატრიოტთა ალიანსს“; 3% - „გირჩს“.
შეკითხვაზე - „რომელი პარტია დგას თქვენს შეხედულებებთან ყველაზე ახლოს?“ - ყველაზე მეტმა, 36%-მა უპასუხა, რომ არც ერთი პარტია. 27% „ქართულ ოცნებას“ ასახელებს, 12% „ერთიან ნაციონალურ მოძრაობას“, 9%-მა უარი თქვა პასუხზე, 5%-მა არ იცის, 3-3%-ს „ევროპული საქართველო“ და „პატრიოტთა ალიანსი“ ინაწილებენ.
შეკითხვაზე „ხვალ რომ საპარლამენტო არჩევნები ტარდებოდეს, გადაწყვეტილი გაქვთ თუ არა, ვის მისცემდით ხმას?“ - 52% გადაუწყვეტელია, 6%-მა კი არ იცის. გამოკითხულთა 42%-ს კი გადაწყვეტილი აქვს, თუ ვის მისცემს ხმას.
ხვალ რომ არჩევნები ტარდებოდეს, გამოკითხულთა 58% მიიღებდა მონაწილეობას.
კვლევა ჩატარებულია NDI-ის დაკვეთით CRRC-საქართველოს მიერ. კვლევა ხორციელდება დიდი ბრიტანეთის მთავრობის UK aid-ის ფინანსური ხელშეწყობით.
კვლევის საველე სამუშაოები ჩატარდა 6-20 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 2205 პირისპირ ინტერვიუს წარმომადგელობითი შერჩევის საფუძველზე.
NDI და CRRC კვლევაში იყენებს სტრატიფიცირებული და კლასტერული შერჩევის მეთოდს: ❖ სტრატიფიცირება – მოსახლეობის დაყოფა შედარებით ჰომოგენურ ჯგუფებად ❖ კლასტერინგი – თითოეული ჯგუფიდან (სტრატა) პატარა გეოგრაფიული არეალების შემთხვევითი შერჩევა ❖ შინამეურნეობის შერჩევა მოხდა შემთხვევითი შერჩევის პრინციპით ❖ რესპონდენტების შერჩევა მოხდა კიშის ცხრილის გამოყენებით ❖ არ ხდება შემთხვევით შერჩეული შინამეურნეობის ან პიროვნების ჩანაცვლება ❖ ყველა ინტერვიუ ჩატარდა პირისპირ ინტერვიუს მეთოდით, 18+ ასაკის მოსახლეობასთან, სამიდან რომელიმე ენაზე: ქართული, სომხური და აზერბაიჯანული.
