რამდენიმე წუთის წინ დასრულდა შეხვედრა პრეზიდენტის ადმინისტრაციაში, ათონელის რეზიდენციაში. სადაც არასამთავრობო სექტორს პრეზიდენტმა უმასპინძლა.
შეხვედრაზე იმყოფებოდა ახალგაზრდა იურისტთა ასოციაციის ხელმძღვანელი, სულხან სალაძეც.
მან „ლიბერალს" უთხრა, რომ საუბარი ბევრ საკითხს შეეხო, მაგრამ კონკრეტულად არაფერი განხილულა. მისი თქმით, ადმინისტრაციამ მოუმზადებლის შთაბეჭდილება დატოვა და მათ არ ჰქონდათ კონკრეტული შეთავაზება,.
მისთვის ასევე მოულოდნელი იყო ის ფაქტი, რომ პრეზიდენტი შეხვედრაში მონაწილეობდა მისასალმებელი სიტყვით და დისკუსიის დრო არ დარჩა.
„მარტივად რომ წარმოვიდგინოთ დიაპაზონი თემებისა, ნახსენები იყო ისეთი საკითხიც, როგოროცაა ლეღვის ნახარშის შესახებ სოციალურ ქსელში ინფორმაციის გავრცელება და ლუგარის ლაბორატორიის გარშემო აგორებული ცრუ კამპანიაც. ცხადია, ერთი და მეორე კარდინალურად განსხვავდება ერთმენეთისგან. ერთია საგარეო საფრთხეები, მეორე - ელემენტარული უცოდინრობა. ვფიქრობ, ამ ტიპის თემების ერთ სიბრტყეზე განხილვა ყოველგვარ აზრს მოკლებულია. მქონდა მოლოდინი, რომ რაიმე ხელშესახებს გავიგებდი დღეს, მაგრამ ასეთი არაფერი ყოფილა.
იურისტის თქმით, მან შეხვედრაზე სიტყვისა და გამოხატვის თავისუფლების შესაძლო შეზღუდვის საფრთხეზე ისაუბრა და მკაფიოდ დააფიქსირა, რომ ამგვარ ინიციატივას მხარდაჭერა არ ექნება.
„რეალურად გავიგეთ რა ფარული ზრახვები შეიძლება ჰქონდეს ხელისუფლებას, რაც შეხვედრის მეორე ნაწილში ცხადი გახდა“, - თქვა შეხვედრიდან გამოსულმა გიორგი მშვნიერაძემ, GDI-დან.
მისი თქმით, ხელისუფლება, სავარაუდოდ, ცილისწამებისთვის მტკიცების ტვირთის შეცვლაზე ფიქრობს.
„რაც ნიშნავს, რომ თუკი დღეს მოსარჩელე, ის პირი, ვინც მიიჩნევს რომ ცილი დასწამეს, ამტკიცებს სასამართლოში, რომ გავრცელებული ინფორმაცია, ფაქტი არის არასწორი და ასე ცდილობს დაამტკიცოს საკუთარი პატივის და ღირსების შელახვა.
ახლა კი მოიაზრება, რომ მტკიცების ტივრთი შეიძლება გადავიდეს მეორე მხარეზე. ეს იქნება ძალიან ცუდი და ჟურნალისტური საქმიანობისა და გამოხატვის თავისუფლების დამაზიანებელი. იმედი მაქვს, რომ ეს მხოლოდ იდეებია და განხილვა არ დაიწყება“, - თქვა მშვენიერაძემ.
