პანკისის ხეობის სოფელ ბირკიანში ჰესების კასკადის მშენებლობის წინააღმდეგ საპროტესტო აქცია იმართება. აქციის მონაწილეები ამბობენ, რომ ჰესების მშენებლობა ხეობას და მის მცხოვრებლებს გამოუსწორებელ ზიანს მიაყენებს.
„ეს არის ჩვენი ცხოვრების ხერხემალი. ეს არე-მარე, მის გარეშე ვერ ვიცხოვრებთ. დამთავრდეს ჰესის მშენებლობის საქმე. მოვუწოდებთ კომპანიას, ნუ გვიმტრობს ქისტ ხალხს“, - ამბობენ ხეობის მცხოვრებლები.
პანკისის ხეობაში ჰესების მშენებლობას მოსახლეობის ნაწილი წლებია, აპროტესტებს. ჰესების მშენებლობის საკითხზე მოსახლეობამ ბოლოს კრება 29 იანვარს გამართა. კრების შემდეგ, როგორც აქტივისტებმა თქვეს, პოლიციამ უხუცესები განყოფილებაში დაიბარა და მათზე ზეწოლა სცადა.
„შეხვედრის დასრულების შემდეგ ადგილობრივმა პოლიციამ მიაკითხა და კახეთის სამხარეო პოლიციაში წაიყვანა ჰესის მშენებლობის იდეის მოწინაადმდეგე უხუცესები, ვინც იქ აზრი ღიად დააფიქსირა.
იქ მყოფი ის აქტივისტები არ დაუბარებიათ, რომლებსაც მედიასთან და არასამთავრობო სექტორთან მჭიდრო კონტაქტი აქვთ.
არ ვიცი ასე ოპერატიულად როგორ მოქმედებენ, მაგრამ გამოხატვის თავისუფლების ასეთი უხეში დარღვევა ძალიან ცუდ შედეგებამდე მიიყვანს ჩვენს ქვეყანას და საზოგადოებას“, - წერდა Facebook-ზე სათემო აქტივისტი და არასამთავრობო ორგანიზაცია EMC-ის თანამშრომელი სულხან ბორძიკაშვილი 29 იანვარს.