საპარლამენტო უმრავლესობის წევრმა, ლევან გოგიჩაიშვილმა მოსამართლეების შესახებ პარლამენტის თავმჯდომარის, ირაკლი კობახიძის გუშინდელი განცხადება გააკრიტიკა. კობახიძის თქმით, „ადამიანები, რომლებიც მასობრივად სჩადიოდნენ ცუდ რაღაცებს, ახლა სჩადიან კარგ რაღაცებს“.
ლევან გოგიჩაიშვილის თქმით, ეს განცხადება მისთვის მიუღებელი და საზოგადოებისთვის დამაბნეველია.
„რას ნიშნავს, რომ ის ადამიანები, რომლებიც ადრე იყვნენ მონები და ახლა გახდნენ კარგები. ეს არის აცდენა, დაბნეულია ძალიან ბევრი ადამიანი. რას ნიშნავს, რომ ადრე ცუდი იყო, ვთქვათ, გვრიტიშვილი და ახლა გახდა კარგი. ყველაფერს ხაზი გადავუსვათ, რომ მურუსიძე გახდეს უვადოდ მოსამართლე?“ - თქვა ლევან გოგიჩაიშვილმა.
„ქართული ოცნების“ ოფისში 11:00 საათზე საპარლამენტო უმრავლესობის კიდევ ერთი სხდომა დაიწყო. მმართველი გუნდის წევრები უზენაესი სასამართლოს მოსამართლეობის კანდიდატების საკითხს განიხილავენ. დღეს შესაძლოა, უმრავლესობა გედევან ფოფხაძემაც დატოვოს. ამის შესახებ დეპუტატი გუშინ საუბრობდა.
