საქართველოს ჭიდაობის ეროვნული ფედერაციის პრეზიდენტის, გეგა გეგეშიძის თქმით, არც მისი საქციელი იყო კარგი, არც სპორტსმენის და დროა, ფედერაციაში დაპირისპირება დასრულდეს.
სპორტის კომიტეტის თავმჯდომარესთან, მიხეილ ყაველაშვილთან, შეხვედრის შემდეგ გეგეშიძემ თქვა, რომ გაიმართება პრეზიდიუმის სხდომა, სადაც იმსჯელებენ სხვადასხვა საკითხზე, მათ შორის იმაზეც, დარჩება თუ არა ფედერაციის პრეზიდენტად.
„ვისაუბრეთ მე და ბატონმა მიხეილმა. ყველაფერი დეტალურად გავიარეთ. შევჯერდით, რომ ჩატარდება პრეზიდიუმის სხდომა, სადაც ვიმსჯელებთ ყველა ამ საკითხზე და გადავწყვეტთ ყველაფერს.
რა თქმა უნდა, ვნანობ. ეს არ არის კარგი. ამას მოჰყვა გამოხმაურება. არ არის არც ჩემი საქციელი კარგი, არც - სპორტსმენის. უნდა გამოვასწოროთ ყველაფერი. სპორტსმენმა უნდა გააგრძელოს ვარჯიში, ოლიმპიური ლიცენზიების მოპოვების წელია და ეს აისახება ჩვენს ფედერაციაზე. უნდა ვეცადოთ, რომ რაც შეიძლება მეტი ლიცენზია მოვიპოვოთ და უნდა მოვრჩეთ ამ კინკლაობას“, - თქვა გეგა გეგეშიძემ.