facebok-ზე ვრცელდება ინფორმაცია, რომ ბორჯომში, საკირეს ხეობაში არქეოლოგიური გათხრებისას რამდენიმე წლის წინ თაფლი აღმოაჩინეს. კვლევების შემდეგ კი აღმოჩნდა, რომ საქართველოში ნაპოვნი თაფლი 5500 წლისაა და მსოფლიოში უძველესია.
ეს ინფორმაცია „ლიბერალს“ საქართველოს კულტურული მემკვიდრეობის დაცვის სააგენტოში არ დაუდასტურეს. სააგენტოს ინფორმაციით, არქეოლოგიურ სამსახურს ამ აღმოჩენის შესახებ არანაირი ინფორმაცია არ აქვს. ასევე უცნობია, თუ ვინმეს ეკუთვნის ეს აღმოჩენა, სად გაიარა მან ლაბორატორიული შემოწმება.
„არ არის სიმართლესთან ახლოს. საეჭვოა, საერთოდ თუ იყო ეს აღმოჩენა, სად გაიარა ლაბორატორიული შემოწმება. ჩვენ არ გვაქვს ინფორმაცია, გაიარა თუ არა მან ლაბორატორიული კვლევა. ეს არ ჰგავს კვალიფიციურ ინფორმაციას“, - უთხრეს „ლიბერალს“ კულტურული მემკვიდრეობის დაცვის სააგენტოში.
Facebook-ის მომხმარებლები წერენ, რომ თაფლის რამდენიმეწლიანი ლაბორატორიული კვლევების შედეგად დადასტურდა მისი ასაკი - 5500 წელი. მათი მტკიცებით, მეცნიერები ადასტურებდნენ იმასაც, რომ თაფლი არის მოშინაურებული ფუტკრის და არა ველურის.
