„ფარულ ჩანაწერებს რაც შეეხება, ვადასტურებ, რომ ეს არის ძალიან ამორალური საქციელი. მისი გადამღებიც, გამავრცელებელიც, ჩემი აზრით, იმსახურებს უმკაცრეს სასჯელს”, - ამის შესახებ საპარლამენტო უმრავლესობის წევრმა ვანო ზარდიაშვილმა განაცხადა.

მისი თქმით, ის ჯგუფთან ერთად, რომელთა შორის ეკა ბესელიაცაა, მოითხოვს, რომ გამოძიება ბოლომდე წარიმართოს და საზოგადოებამ იხილოს გამოძიების შედეგები.

რაც შეეხება კითხვას, რომ ეკა ბესელია ფარული ჩანაწერების გავრცელების ინტერესთან დაკავშირებით „ნაციონალებიდან“ პორტირებულებზე საუბრობს, ზარდიაშვილი აცხადებს, რომ „ამ კადრების გავრცელება შედის ალბათ „ნაციონალების“ ინტერესში და პორტირებულებს თუ ვეხებით, ეს შეიძლება იყოს „ოცნებიდან“ პორტირებულების ინტერესში“.

„არასდროს ჩემს ცხოვრებაში არ ვყოფილვარ „ნაციონალური მოძრაობის“ წევრი, მაქსიმალური თანამდებობა რაც მე მეკავა „ნაციონალური მოძრაობის“ დროს, ეს იყო განყოფილების უფროსი. მათ შორის ჩვენს გუნდში ნახავთ უფრო დიდი თანამდებობის პირებს, რომლებიც „ნაციონალური მოძრაობის“ დროს მუშაობდნენ. შესაბამისად, რაიმე ფორმით დაკავშირება 7 წლის წინანდელ ისტორიასთან [არამგონია სწორი იყოს]“, - ამბობს ზარდიაშვილი.