შს მინისტრმა გიორგი გახარიამ თიბისი ბანკის შესახებ ჟურნალისტების მიერ დასმულ შეკითხვებს უპასუხა. გახარიას კომენტარს უწყების პრესსამსახური ავრცელებს. 

მინისტრის თქმით, როგორც ყოფილი ბიზნესომბუდსმენი, ფიქრობს რომ TBC ბანკი არის სისტემური ბანკი ქვეყნისთვის.

„დარწმუნებული ვარ, რომ ეს ყველაზე კარგად ესმის ეროვნულ ბანკს და მარეგულირებელს. არ არსებობს დღეს ქვეყანაში ინსტიტუცია, რომელსაც უკეთესად ესმის „TBC ბანკის" ფინანსური სისტემისთვის მნიშვნელობა, ვიდრე ეს რეგულატორს, ამიტომ აქ ვერანაირი კითხვის ნიშნები ვერ იქნება, მით უმეტეს ჩემი მხრიდან და აქ ჩემი კომენტარები, მაშინ როდესაც რეგულატორი თავის მანდატშია შესული, აბსოლუტურად უადგილო და ზედმეტია". - განაცხადა გიორგი გახარიამ. 

TBC დავას სასამართლოში გააგრძელებს - ეროვნული ბანკი ხაზარაძე-ჯაფარიძის გადაყენებას ითხოვს

ეროვნული ბანკი თიბისი ბანკის სამეთვალყურეო საბჭოს თავმჯდომარის მამუკა ხაზარაძისა და მისი მოადგილის ბადრი ჯაფარიძის ხელმოწერის უფლების შეჩერებას ითხოვს. თიბისი ბანკის აქციონერთა კრებას მიეცა 2-თვიანი ვადა მათი სამეთვალყურეო საბჭოდან გაწვევისათვის. ეროვნული ბანკის განცხადებაში აღნიშნულია, რომ „გადაწყვეტილება არ არის მიმართული თიბისი ბანკზე“.

ეროვნული ბანკის განცხადებით, ამ გადაწყვეტილების მიღების საფუძველია „თიბისი ბანკის შემოწმებისას დაფიქსირებული ინტერსთა კონფლიქტის მარეგულირებელი კანონმდებლობის დარღვევის ფაქტები, რომლებიც 2007-2008 წლების ტრანზაქციებს უკავშირდება. საკითხის შესწავლისას გამოვლინდა თიბისი ბანკის სამეთვალყურეო საბჭოს თავმჯდომარისა და მოადგილის მიერ ინტერესთა კონფლიქტის მარეგულირებელი საკანონმდებლო მოთხოვნების დარღვევა“.

თიბისი ბანკი ეროვნული ბანკის გადაწყვეტილებას საგანგებო განცხადებით გამოეხმაურა, სადაც აღნიშნულია რომ დავას სასამართლოში გააგრძელებს.