გიორგი ვაშაძის პარტია „ახალი საქართველოს" სოციალური მიმართულების ხელმძღვანელმა თეონა ჭალიძემ წარმოადგინა დოკუმენტაცია, რომლის თანახმად, სამტრედიის საბავშვო ბაღების ცხენის ხორცით მომარაგება დასტურდება.  

სახელმწიფო შესყიდვების სააგენტოს თავმჯდომარის განკარგულების საფუძველზე სურსათის მიმწოდებელი შპს „ელენიკო" შავ სიაში დაარეგისტრირეს. აღნიშნული დოკუმენტი დღეს გამართულ ბრიფინგზე თეონა ჭალიძემ წარმოადგინა. განკარგულების თანახმად, სწორედ, შპს „ელენიკო" მიერ საბავშვო ბაღებისთვის მიწოდებულ ხორცს ჩაუტარდა ლაბორატორიული კვლევა, რის შემგედაც დადგინდა, რომ ხორცის ნიმუშები შეიცავდა ცხენის დნმ-ს. შავ სიაში შეყვანასთან ერთად, კომპანია 20 545 ლარით დააჯარიმეს. 

სამტრედიის სკოლამდელი აღზრდის დაწესებულებათა გაერთიანების დირექტორი ხათუნა გაგუა შარშან ოქტომბერში საბავშვო ბაღებისთვის ცხენის ხორცის მიწოდების ფაქტს ადასტურებს. „სურსათის ეროვნულმა სააგენტომ, როგორც კი შეამჩნია საეჭვო ხორცი, ამოიღო და ანალიზიც გაუკეთა, რის შემდეგაც კომპანია ჯარიმაზე გავუშვით და ხელშეკრულება შევწყვიტეთ. სამტრედიის მუნიციპალიტეტში სულ 24 საბავშვო ბაღია და მათ ვამარაგებდით", - ამბობს გაგუა.