ილიას სახელმწიფო უნივერსიტეტის სტუდენტებმა საპროტესტო შიმშილობა შეწყვიტეს. „ლიბერალის“ კორესპონდენტის ცნობით, სტუდენტებმა შიმშილობა მას შემდეგ შეწყიტეს რაც, უნივერსიტეტის ადმინისტრაციისგან მიიღეს წერილობითი თანხმობა სამუშაო ჯგუფის შექმნის თაობაზე. სტუდენტების თქმით, სამუშაო ჯგუფი სტუდენტების ჩართულობით იმუშავებს ერთი მხრივ უნივერსიტეტის წესდების შეცვლაზე, მეორე მხრივ გადაიხედება უნივერსიტეტში დაწყებული რეორგანიზაცია. თავიანთი მოთხოვნების დასაკმაყოფილებლად სტუდენტები აქციების გაგრძელებას არ გამორიცხავენ.
„სასიხარულოა, რომ პროტესტის რადიკალური ფორმა დასრულდა. ჩვენ დღეს დილით გვქონდა ხანგრძლივი შეხვედრა სტუდენტებთან, აკადემიურ საბჭოს წარმომადგენლებთან და მოვილაპარაკეთ იმაზე, რომ მუშაობას გავაგრძელებთ, არის კონკრეტული საკითხები, რომელზეც შეთანხმებული ვართ, რომ აუცილებლად ცვლილებები იქნება“,- განაცხადა უნივერსიტეტის რექტორმა გიგა ზედანიამ.
დღეს ილიას სახელმწიფო უნივერსიტეტში სტუდენტების, აკადემიური და წარმომადგენლობითი საბჭოების გაერთიანებული შეხვედრა გაიმართა.
შეხვედრის დასრულების შემდეგ მიიღეს დოკუმენტი, რომელშიც ნათქვამია, თუ რას სთავაზობს უნივერსიტეტი მოშიმშილე სტუდენტებს დეკლარირებულად.
„ა) ბიზნესსკოლის ავტონომიურობის უზრუნველსაყოფად ახალი ფაკულტეტის ფარგლებში შეიქმნას ბიზნესის მიმართულების რეფორმაზე მომუშავე ჯგუფი, რომელიც დაკომპლექტდება აკადემიური და წარმომადგენლობითი საბჭოების, სტუდენტებისა და ბიზნესის სკოლის პროფესორების მონაწილეობით. აღნიშნული ჯგუფი შეიმუშავებს რეკომენდაციებს ამ მიმართულებით; გაგრძელდეს მუშაობა ახალი ფაკულტეტის სახელწოდებასა და პროგრამების შინაარსზე;
ვადა - 2 კვირა
ბ) უნივერსიტეტის წესდებაში ცვლილებების შესატანად შექმნას საუნივერსტეტო სტუდენტური ჯგუფი, რომელიც შეიმუშავებს რეკომენდაციებს ამ მიმართულებით.
ვადა - 3 თვე“.
