ცხინვალს მთიანი ყარაბაღის დე ფაქტო საგარეო საქმეთა მინისტრი, მასის მაილიანი სამდღიან ვიზიტით ესტუმრა. სამხრეთ ოსეთის დე ფაქტო პრეზიდენტმა, ბიბილოვმა მაილიანთან შეხვედრისას თქვა, რომ „ისინი ორმხრივის თანამშრომლობის გაღრმავებაზე შეთანხმდნენ, ოსი და სომეხი ხალხის მეგობრობის ნიშნად კი ცხინვალში ჯვარს აღმართავენ".
მთიანი ყარაბაღის დე ფაქტო საგარეო საქმეთა მინისტრი ცხინვალში ორშაბათს ჩავიდა. ანატოლი ბიბილოვამდე ის ცხინვალელ კოლეგას დიმიტრი მედოევს შეხვდა. მათ თანამშრომლობაზე შეთანხმებას მოაწერეს ხელი.
„აქ მცხოვრებმა სომხებმა ოსი და სომეხი ხალხის მეგობრობის ნიშნად ჯვრის აღმართვა გვთხოვეს. თხოვნა დაკმაყოფილდა, სომხეთის ქუჩაზე მოეწყობა სკვერი, რომელშიც მეგობრობის ნიშნად ჯვარს დადგამენ. ეს იქნება ოსი და სომეხი ხალხის მეგობრობის სიმბოლო“, - განაცხადა ანატოლი ბიბილოვმა.