საქართველოს პრეზიდენტის სალომე ზურაბიშვილის თქმით, ის არის „ქალი ორი ქვეყნიდან“ და ქართული წარმომავლობისა და საფრანგეთთან კავშირის გამო აირჩია ხალხმა. ამის შესახებ ზურაბიშვილმა ფრანგულ რადიოსადგურ RTL-თან ინტერვიუში ისაუბრა. ინფორმაციას „საზოგადოებრივი მაუწყებელი“ ავრცელებს.

„მე თავს ვგრძნობ, როგორც სახლში. მე ყოველთვის ვამბობდი და რამდენიმე წლის წინ დაწერილ წიგნშიც აღვნიშნე, რომ მე ვარ ქალი ორი ქვეყნიდან. დღეს მე ვარ იმ ქვეყნის სამსახურში, რომელიც ჩემმა მშობლებმა, ბებიამ და პაპამ დატოვეს, როდესაც ქვეყანამ დამოუკიდებლობა დაკარგა“, - თქვა სალომე ზურაბიშვილმა.

პრეზიდენტი მიიჩნევს, რომ ქართულმა წარმომავლობამ და ფრანგულმა განათლებამ არჩევნებში მას უპირატესობა მისცა, საფრანგეთთან მისი კავშირი ხალხმა ევროპაში დასაყრდენად აღიქვა. საქართველოს პრეზიდენტმა აღნიშნა, რომ საფრანგეთში დაბრუნება მისთვის სიმბოლურია.

„მე გარკვეულწილად იმიტომაც ამირჩიეს, რომ ევროპაში დასაყრდენი მქონდა“, - თქვა ზურაბიშვილმა ინტერვიუში. „ვფიქრობ, სწორედ ამან მოიზიდა ამომრჩევლები“.