დღეს პრეზიდენტი პარლამენტის წინაშე ქვეყნის მდგომარეობის უმნიშვნელოვანეს საკითხებზე ყოველწლიური მოხსენებით გამოვა.
პარლამენტის ახალი რეგლამენტის გათვალისწინებით, პრეზიდენტის მოხსენებით გამოსვლა შემდეგი პროცედურით გაგრძელდება: თავდაპირველად 10-10 წუთი იმ ფრაქციების თავმჯდომარეებს დაეთმობათ, რომლებიც არ შედიან საპარლამენტო უმრავლესობასა და უმცირესობაში. პარლამენტში ამჟამად ასეთი ორი ფრაქციაა: „ნაციონალური მოძრაობა“ და „საქართველოს პატრიოტები“, თუმცა „ნაციონალური მოძრაობის“ წევრები დღევანდელ პლენარულ სხდომაში მონაწილეობას არ მიიღებენ.
ამის შემდეგ საპარლამენტო ტრიბუნა 15-15-წუთით საპარლამენტო უმრავლესობისა და უმცირესობის ლიდერებს დაეთმობათ.
გამოსვლების დასრულების შემდეგ პრეზიდენტი უფლებამოსილია, დასკვნითი სიტყვით გამოვიდეს.
