„რუსთავი 2-ის“ ინფორმაციით, შინაგან საქმეთა მინისტრმა გიორგი გახარიამ მამუკა ხაზარაძისთვის გადასაცემად წერილი ხაზარაძის პარტნიორს ბადრი ჯაფარიძეს გადასცა. ტელეკომპანიის განცხადებით, მათ ამის შესახებ ორი დამოუკიდებელი წყაროსგან გაიგეს. „შაბათის კურიერში“ მომზადებული სიუჟეტის მიხედვით, „თიბისი ბანკის“ ერთ-ერთი დამფუძნებელი და შს მინისტრი თბილისში მეზობლები არიან.

საქართველოს პროკურატურამ 6 მარტს გამოაქვეყნა წერილის შინაარსი, რომელიც, უწყების თქმით, მამუკა ხაზარაძემ სასამართლოში დაკითხვაზე მიიტანა. ხაზარაძის თქმით, მან მუქარის წერილი შუამავლის მეშვეობით მიიღო. თუმცა, შუამავლის ვინაობა, როგორც მისმა ადვოკატმა განმარტა მისივე ინტერესებიდან გამომდინარე არ დაასახელა.

წერილის მიხედვით, მამუკა ხაზარაძისგან მოითხოვდნენ, რომ „ტვ პირველს“ ხელისუფლების მხარდამჭერი პოლიტიკა გაეტარებინა, თავად ხაზარაძეს გაევრცელებინა წერილი, რომლითაც „ნაციონალურ მოძრაობას“ გააკრიტიკებდა და ტელეკომპანია „არტარეას“ „ობიექტურობის მაღალი ხარისხი ეჩვენებინა“.

„წინააღმდეგ შემთხვევაში, გამოვიყენებთ ჩვენს ხელთ არსებულ ყველა სამართლებლივ და ობიექტურ საშუალებას და გავაკეთებთ ამას საჯაროდ, შიდა და საერთაშორისო მომხმარებლებისთვის“, - ნათქამი იყო წერილის ასლში, რომელიც პროკურატურამ გაავრცელა.