საქართველოს ჭიდაობის ნაკრების კაპიტანის, ზურაბ დათუნაშვილის თქმით, ის ჭიდაობის ეროვნული ფედერაციისგან ელოდება გათავისუფლებაზე თანხმობას, რის შემდეგაც ასპარეზობას სხვა ქვეყნის სახელით განაგრძობს.
როგორც დათუნაშვილმა „ლიბერალთან“ განაცხადა, მას თავიდანვე ჰქონდა ნათქვამი, რომ თუ ჭიდაობის ეროვნული ფედერაციის პრეზიდენტი გეგა გეგეშიძე არ დატოვებდა თანამდებობას, ის სხვა ქვეყნის სახელით გააგრძელებდა ჭიდაობას.
„მე თავიდანვე მქონდა ამის შესახებ გაცხადებული. სხდომაზე მივმართე და განვუცხადე ყველას ამის შესახებ. ამ ეტაპზე არ ვიცი, რომელი ქვეყნის სახელით ვიასპარეზებ“, - თქვა დათუნაშვილმა.
როგორც „ლიბერალს“ ჭიდაობის ეროვნულ ფედერაციაში უთხრეს, არ არსებობს პროცედურა, რომელიც მოჭიდავეს გაათავისუფლებს/გაუშვებს.
„არ არსებობს ასეთი პორცედურა, ჩვენ არ ვუშვებთ არავის და კარგი იქნება თუ სხვა ფედერაციებიც მოგვბაძავენ. მოჭიდავე თავად წყევტს, წავიდეს თუ არა ნაკრებიდან და იასპრეზოს თუ არა სხვა ქვეყნის სახელით“, - განაცხადეს ფედერაციაში.
11 იანვარს სპორტის სასახლეში გამართულ ჩემპიონატზე ზურაბ დათუნაშვილისა და რობერტ კობლიაშვილის შეხვედრა გაიმართა. ამ შეხვედრის შემდეგ უნდა გადაწყვეტილიყო, ვინ წავიდოდა ევროპის ჩემპიონატზე. დათუნაშვილმა მსაჯის გადაწყვეტილება გააპროტესტა, რასაც კონფლიქტი და დაპირისპირება მოჰყვა. „რუსთავი 2-ის“ მიერ გავრცელებულ კადრებში ჩანს, რომ ფიზიკურ დაპირისპირებაში ჩართული იყო ფედერაციის პრეზიდენტი გეგა გეგეშიძეც. დათუნაშვილი აცხადებდა, რომ გეგეშიძემ მას ფიზიკური შეურაცხყოფა მიაყენა და თავში ბლაგვი საგანი ჩაარტყა. ინციდენტიდან რამდენიმე დღეში მან განცხადება გაავრცელა ფედერაციაში მიმდინარე არაჯანსაღ გარემოსთან დაკავშირებით და საზოგადოებას ამით დაინტერესებას სთხოვდა. დათუნაშვილი ასევე აცხადებდა, რომ თუ გეგა გეგეშიძე თანამდებობას არ დატოვებდა, ნაკრებიდან წავიდოდა და სხვა ქვეყნის სახელით გააგრძელებდა ასპარეზობას.
.
