ოკუპირებულ აფხაზეთში გარდაცვლილ ირაკლი კვარაცხელიას ცხედარს ექსპერტიზა სამხარაულის ეროვნულ ბიუროში ჩაუტარდა. ექსპერტ ირაკლი თოიძის განცხადებით, გარდაცვლილს ყელზე დაზიანებები აღენიშნება.
„არის თოკის ჩანართები. მეტი დაზიანება ფაქტობრივად, არ არის. დამატებითი გამოკვლევების შემდეგ დადგინდება რაღაცები. დაზიანებები რაც იყო, არის ყელზე უმნიშვნელო ნაჭდევები. ეს სიცოცხლის დროინდელია თუ სიკვდილის შემდეგ განვითარებული, ამაზე ლაბორატორიული კვლევა ჩატარდება“, - განაცხადა ექსპერტმა ირაკლი თოიძემ.
საქართველოს უსაფრთხოების სამსახურის ინფორმაციით, ოკუპირებული გალის რაიონში 1990 წელს დაბადებულმა საქართველოს მოქალაქემ, რომელიც დე ფაქტო ხელისუფლებას ჰყავდა დაკავებული, თავი მოიკლა.
საქართველოს საგარეო საქმეთა მინისტრის დავით ზალკალიანის თქმით, ხელისუფლება ყველა სახის ინსტრუმენტს გამოიყენებს, რომ გალში საქართველოს მოქალაქის თვთმკვლელობის გამომწვევი გარემოებები დეტალურად დადგინდეს და ამის შესახებ საერთაშორისო თანამეგობრობა ამომწურავად იყოს ინფორმირებული.
