ლაგოდეხის აღკვეთილში სახეობათა კონსერვაციის ცენტრმა NACRES-მა GPS საყელურით პირველი აღმოსავლეთკავკასიური ჯიხვი მონიშნა.
გარემოს დაცვის სამინისტროს ინფორმაციით, GPS საყელურით 6 ჯიხვის აღჭურვა იგეგმება. საყელურს 2 წლის სამუშაო რესურსი აქვს და ინფორმაციას სატელიტური თანამგზავრების მეშვეობით გადმოსცემს.
პროექტი „ჯიხვის ტელეომეტრიული მონიტორინგი ლაგოდეხის დაცულ ტერიტორიებზე“ 2018 წელს დაიწყო.
„ჯიხვის ტელეომეტრიული კვლევა დაგვეხმარება, შევისწავლოთ, დავაკვირდეთ და მოვაგროვოთ ჯიხვის პოპულაციისათვის მნიშვნელოვანი ინფორმაცია: ჯიხვის ჰაბიტატის გამოყენების ასპექტები, ინდივიდუალური ტერიტორიის ზომა, დღე-ღამური და სეზონური გადაადგილებისა და მიგრაციის თავისებურება.
ტელემეტრიულ მონაცემებზე დაყრდნობით შესაძლებელია პოპულაციის რიცხოვნობის, დინამიკის დადგენა, პოპულაციაზე მოქმედი საფრთხეების შეფასება.
ტელემეტრია ასევე დაგვეხმარება, შევაფასოთ ტურიზმისა და ძოვების ზეგავლენა ჯიხვის პოპულაციაზე. მოპოვებული მონაცემების ანალიზის შედეგად გაუმჯობესდება ლაგოდეხის დაცული ტერიტორიების ეფექტიანი მართვა“ - თქვა ლაგოდეხის დაცული ტერიტორიების ადმინისტრაციის დირექტორმა, გიორგი სულამანიძემ.