ყაზახეთის პრეზიდენტის მოვალეობის შემსრულებელმა, კასიმ-ჟომარტ ტოკაევმა ნურსულთან ნაზარბაევის თანამდებობიდან წასვლის მეორე დღეს ინიციატივა წამოაყენა, რომ ქვეყნის დედაქალაქს ასტანას ექსპრეზიდენტის სახელი ეწოდოს.
„ჩემი ინიციატივაა, რომ დედაქალაქ ასტანას პირველი პრეზიდენტის პატივსაცემად სახელი გადავარქვათ“, - თქვა ტოკაევმა, რომელსაც სურს ასტანას „ნურსულთანი“ დაერქვას.
„ნაზარბაევის შეხედულებები იქნება განსაკუთრებული, პრიორიტეტული და მნიშვნელოვანი ჩვენს შემდგომ განვითარებასა და სტრატეგიული გადაწყვეტილებების მიღებისას“, - განაცხადა ქვეყნის ახალმა ლიდერმა.
ტოკაევი, რომელიც დიპლომატი იყო, სენატის სპიკერის თანამდებობას იკავებდა ნაზარბაევის პრეზიდენტობისას. კანონმდებლობის შესაბამისად, სენატის სპიკერი პრეზიდენტის მოვალეობას 2020 წლამდე შეასრულებს. მომავალ წელს კი საპრეზიდენტო არჩევნები გაიმართება.
ნურსულთან ნაზარბაევმა თითქმის 30-წლიანი მმართველობის შემდეგ მოულოდნელად განაცხადა თანამდებობიდან წასვლის შესახებ. ის ყაზახეთის დამოუკიდებლობის მოპოვების შემდეგ ქვეყნის პირველი პრეზიდენტია.
