„ლიბერალის" კორესპონდენტის ცნობით, პირადი ცხოვრების ამსახველი ფარული ვიდეოჩანაწერების საქმეზე დაპატიმრებული პირების სასამართლო პროცესი თბილისის საქალაქო სასამართლოში დღეს გაიმართა.
აღნიშნულ საქმეზე ბრალდებული 18 პირიდან 4 პირს (ზაალ ლატარიას, ზურაბ სოლომნიშვილს, თემურ ირემაძეს და ანტონ ღლონტს) აღკვეთის ღონისძიების სახით პატიმრობა ჰქონდა შეფარდებული და აღნიშნული გადაწყვეტილება სასამართლომ ძალაში დატოვა.
„ეს არის სრულიად გაუგონარი და არასწორი გადაწყვეტილება. ვინაიდან არ არსებობდა აღკვეთის ღონისძიების უმკაცრესი ფორმის გამოყენების არც ფორმალური და არც მატერიალური საფუძვლები. არავითარი დასაბუთება არ მოგვისმენია ჩვენ ბრალდების მხარისგან, თუ რა საფრთხეები არსებობდა ისეთი, რაც პატიმრობას განაპირობებდა.
მოცემულობა რაც ამ საქმეზე მივიღეთ სასამართლო წარმოების პროცესში, გვაძლევს იმის თქმის საშუალებას, რომ ამ საქმეზე სასამართლო იქცევა ძალიან ცუდად, იღებს არასწორ გადაწყვეტილებებს. ათობით, ასობით თუ ათასობით ადამიანს იგივე ქმედება აქვს ჩადენილი.
ბრალდების მხარემ უნდა გამოიძიოს და დაადგინოს ვინ იყო ამ ინფორმაციის გამავრცელებელი პირველი წყარო, საიდან წამოვიდა ეს კადრები, ვინ გადაიღო და შეეშვას იმ ადამიანებს, რომლებიც საერთოდ არ არიან ამ ინკრიმინებული ქმედების ობიექტები, რომლებსაც არც ჩაუწერიათ ფარულად, არც მოუპოვებიათ და არც პირადი ინტერესი ჰქონიათ, რომ ეს კადრები სოციალურ ქსელებში მათგან მოხვედრილიყო. ეს არის მიუღებელი გადაწყვეტილება“, - განაცხადა ერთ-ერთი ბრალდებულის ადვოკატმა სასამართლო სხდომის დასრულების შემდეგ.
მათ ბრალი სისხლის სამართლის კოდექსის 157-ე პრიმა მუხლით ედებათ, რაც სასჯელის სახით ითვალისწინებს: 157-ე პრიმა მუხლი ითვალისწინებს: 1. პირადი ცხოვრების საიდუმლოს უკანონოდ მოპოვება, შენახვა, გამოყენება, გავრცელება ან ხელმისაწვდომობის სხვაგვარი უზრუნველყოფა, – ისჯება თავისუფლების აღკვეთით, ვადით 4-დან 7 წლამდე. 2. პირადი ცხოვრების საიდუმლოს უკანონოდ გამოყენება ან/და გავრცელება ამა თუ იმ ხერხით გავრცელებული ნაწარმოების, ინტერნეტის, მათ შორის, სოციალური ქსელის, მასობრივი მაუწყებლობის ან სხვა საჯარო გამოსვლის მეშვეობით, − ისჯება თავისუფლების აღკვეთით, ვადით 5-დან 8 წლამდე.