ფრაქცია „ქართული ოცნება - მრეწველების" თავმჯდომარის, სიმონ ნოზაძის შეფასებით, ყაზახეთის ყოფილი პრეზიდენტი ნურსულთან ნაზარბაევი თავისი ქვეყნის დიდი შვილია, რომელმაც ქვეყანა რელსებზე დააყენა. ამის შესახებ მან პარლამენტში ისაუბრა.
„უამრავი მეგობარი მყავს ყაზახეთში და მინდა გითხრათ, რომ ნუსრულთან ნაზარბაევი თავისი ქვეყნის დიდი შვილია. მან დემოკრატიის რელსებზე დააყენა და ეკონომიკური დინამიკა მიანიჭა ქვეყნის განვითარებას. [თანამდებობიდან გადადგომის შესახებ] ორი დღის წინანდელი მისი გადაწყვეტილებაც ამ ქვეყანაში დემოკრატიის გამარჯვების დამადასტურებელია" - თქვა სიმონ ნოზაძემ.
ნურსულთან ნაზარბაევმა თითქმის 30-წლიანი მმართველობის შემდეგ მოულოდნელად განაცხადა თანამდებობიდან წასვლის შესახებ. ის ყაზახეთის დამოუკიდებლობის მოპოვების შემდეგ ქვეყნის პირველი პრეზიდენტია.
ყაზახეთის პრეზიდენტის მოვალეობის შემსრულებელმა, კასიმ-ჟომარტ ტოკაევმა ნურსულთან ნაზარბაევის თანამდებობიდან წასვლის მეორე დღეს ინიციატივა წამოაყენა, რომ ქვეყნის დედაქალაქს ასტანას ექსპრეზიდენტის სახელი ეწოდოს.
„ჩემი ინიციატივაა, რომ დედაქალაქ ასტანას პირველი პრეზიდენტის პატივსაცემად სახელი გადავარქვათ“, - თქვა ტოკაევმა, რომელსაც სურს ასტანას „ნურსულთანი“ დაერქვას.
დღეს პარლამენტმა ინიციატივას მხარი დაუჭირა.