მთაწმინდის შუალედურ არჩევნებზე „გირჩის" მაჟორიტარმა კანდიდატმა, ჰერმან საბომ დღეს გამართულ ბრიფინგზე მხარდამჭერების მობილიზების მეთოდზე ისაუბრა.
ჰერმან საბო „გირჩის" მთაწმინდელ მხარდამჭერებს მოუწოდებს, რომ პარტიას გამოეხმაურონ და მთელი ქვეყნის მასშტაბით „გირჩის" მხარდამჭერებს მათთან მასობრივად გადაწერის საშუალება მისცენ.
ხოლო მხარდამჭერებს, რომლებიც მთაწმინდაზე არ ცხოვრობენ, საბო სთხოვს, გამოეხმაურონ და მთაწმინდაზე ამ ხალხთან გადაეწერონ.
ბევრი ადამიანის ჩაწერის გამო ბინების მფლობელებს გაბერილი კომუნალური გადასახადის გადახდა, რომ არ მოუწიოთ, „გირჩი" საკუთარ თავზე იღებს აღნიშნულ მისამართებზე იმ კომუნალური გადასახადის გადახდას, რომელსაც სულადობით ითვლიან (წყლის და დასუფთავების გასდასახადის).
გარდა ამისა, როგორც ჰერმან საბომ თქვა, ყველას, ვინც ამ პროექტში მიიღებს მონაწილეობას, დაერიცხება „გირჩის" ციფრული ვალუტა.
„ამ არჩევნებში გამარჯვების რეალური შანსი გვაქვს. ჩემზე უკეთეს კანდიდატს ჯერჯერობით ვერ ვხედავ", - აღნიშნავს საბო.
კანდიდატის განმარტებით, პარტიამ ცესკოში გაარკვია და მოქალაქეებს მარტივად შეუძლიათ ერთი რაიონიდან მეორეში გადაწერა.
„საცხოვრებელი ადგილის შეცვლის უფლება კონსტიტუციითაც არის დაცული", - ამბობს ჰერმან საბო.