ათენში რუსეთის საკონსულოს მოტოციკლეტზე მჯდომმა თავდამსხმელებმა ხელყუმბარა ესროლეს. პოლიციის განცხადებით, თავდასხმის შედეგად არავინ დაშავებულა.
Reuters-ის ინფორმაციით, დღეს დილით მომხდარ თავდასხმაზე პასუხისმგებლობა, ჯერჯერობით, არავის აუღია. პოლიციამ ტერიტორია შემოსაზღვრა და გამოძიება დაიწყო.
ასაფეთქებელი მოწყობილობა დაცვის ჯიხურთან აფეთქდა, მაგრამ, როგორც აღმოჩნდა, ძლიერი არ იყო და ჯიხური მხოლოდ მცირედით დაზიანდა.
„მცირე მატერიალური ზიანი იყო, არავინ დაშავებულა“, - განაცხადა პოლიციის წარმომადგენელმა.
საბერძნეთის საგარეო საქმეთა სამინისტრომ თავდასხმა დაგმო. „მსგავსი უკანონო და უკიდურესად აღმაშფოთებელი ქმედებები გავლენას ვერ მოახდენს რუსეთთან ჩვენს ტრადიციულ და საუკუნოვან მეგობრულ კავშირზე“, - ნათქვამია სამინისტროს განცხადებაში.
