Search
"ლიბერალი" მისამართი: თბილისი, რუსთაველის 50 ტელეფონი: +995 32 2470246 ელ. ფოსტა: [email protected] Facebook: https://www.facebook.com/liberalimagazine
გაგზავნა
გაგზავნა

გიორგი გახარია ზვიად რატიანის საქმეზე: არც ერთი წუთით არ ვნანობ

23 მარტი, 2019 10:31

„იმ არატრაგიკული, სამწუხარო შემთხვევიდან ჩვენ გარკვეული დასკვნები გამოვიტანეთ და რეალურად, ხარისხობრივად ბევრი რაღაც გავასწორეთ. არც ერთი წუთით, იმაზე, რაც მოხდა მაშინ, არ ვნანობ, იმიტომ, რომ ჩვენ მოქალაქეები ვართ და ჩვენი პასუხისმგებლობა გვაქვს ყველგან, ნასვამები ვართ, ქუჩაში ვართ თუ სად ვართ, რას ვამბობთ, იმაზეც", - განაცხადა შინაგან საქმეთა მინისტრმა გიორგი გახარიამ პოეტ ზვიად რატიანის საქმის შესახებ „ტვ პირველის" ეთერში.

მინისტრი რატიანის ცემის ფაქტს უარყოფს და აცხადებს: „ვინ ცემა, ვინ გითხრათ, რომ ცემეს? სასამართლომ სხვა რამე თქვა".

-----------------------------------------------------------------------------

EMC ზვიად რატიანის საქმეზე შინაგან საქმეთა მინისტრის გუშინდელ განცხადებას ეხმაურება

ზვიად რატიანი, სპეციალური საპოლიციო კონტროლის (რეიდის) ფარგლებში, 2018 წლის 23 დეკემბერს დააკავეს. პოლიცია მას წვრილმან ხულიგნობასა და პოლიციისადმი დაუმორჩილებლობას ედავებოდა.

ზვიად რატიანი 2017 წლის 23 დეკემბერს ასე იხსენებს: „იყვნენ აგრესიულები, მესაუბრებოდნენ ცუდად, ჩამტენეს მანქანაში. სულელურად კი ჟღერს, მაგრამ ახსენებდნენ ქურთუკს და მეუბნებიოდნენ - ეს რა ფერია, რა გაცვია ბიჭოო. რამდენიმე საათი გაგრძელდა ჩემი მანქანით ტარება აქეთ-იქით. მირტყამდნენ განუწყვეტლივ. წამიყვანეს განყოფილებაში. იქ გააფორმეს, რომ მე თურმე მქონდა დაზიანებები და ქუჩაში ვიყავი ამ დაზიანებებით და ვიგინებოდი. ყველაზე დაუნდობლად აქ გავილახე. სადღაც ათზე მეტი დაზიანება დააფიქსირა ექიმმა”.

თბილისის საქალაქო სასამართლოში სამართალდარღვევის საქმის განხილვისას, შინაგან საქმეთა სამინისტროს მხრიდან, წარდგენილ იქნა პოლიციის თანამშრომლების მიერ, საკუთარი მობილური ტელეფონით გადაღებული, ფრაგმენტული ვიდეოჩანაწერები. ზვიად რატიანის გადაღება პოლიციელებმა განახორციელეს ეპიზოდურად, ისე რომ მასზე აღბეჭდილი არ ყოფილა პოლიციისა და მოქალაქის კომუნიკაციის საწყისი ეტაპი, ასევე ინცინდენტის განვითარება.

შსს-ს მიერ წარდგენილი ვიდეოჩანაწერის გამოკვლევა განხორციელდა ღია სასამართლო სხდომაზე. თუმცა, მისი აღქმადობა შეზღუდული იყო უშუალოდ მხარეებისა და სასამართლოსთვის. სხდომაზე დამსწრე სხვა პირებისთვის, მათ შორის მედიის წარმომადგენლებისთვის, აღნიშნული მტკიცებულების ზუსტი შინაარსი აღქმადი არ ყოფილა.

სასამართლოს სხდომის შემდეგ, 2017 წლის 27 დეკემბერს, საზოგადოებრივი მაუწყებლის ჟურნალისტმა განცხადებით მიმართა საქართველოს შინაგან საქმეთა სამინისტროს და მოითხოვა, აღნიშნული მტკიცებულების გადაცემა. მითითებული წერილის საფუძველზე შსს-მ საზოგადოებრივ მაუწყებელს, უკანონოდ, მოსარჩელის ინფორმირებისა და მისი ნებართვის აღების გარეშე გადასცა ვიდეო ჩანაწერი, რომელიც გავიდა საზოგადოებრივი მაუწყებლის ეთერში. საზოგადოებრივი მაუწყებლის მიერ მითითებული ვიდეოკადრების გავრცელების შემდგომ, ისინი სხვა მედიასაშუალებებმაც გამოაქვეყნეს. იმის გათვალისწინებით, რომ მითითებული საკითხი იმ პერიოდისთვის მაღალი საზოგადოებრივი ინტერესის საგანს წარმოადგენდა, ზვიად რატიანის ამსახველი ვიდეოკადრები ათიათასობით ადამიანმა ნახა.

„ადამიანის უფლებების სწავლებისა და მონიტორინგის ცენტრის" განცხადებით, შინაგან საქმეთა სამინისტროს მხრიდან ვიდეოკადრების მედიისთვის გადაცემისა და მისი გავრცელების შემდგომ, ზვიად რატიანი მუდმივი საზოგადოებრივი წნეხისა და ყურადღების ქვეშ უწევდა ცხოვრობა. საჯარო სივრცეში ყოფნისას, მისი მისამართით ხშირად ისმოდა ირონიული, დამცინავი შეძახილები, კომენტარები, გამუდმებული მზერა, რამაც მას თავისუფლად ცხოვრების შესაძლებლობა წაართვა. ვიდეოჩანაწერების გასაჯაროვების შემდეგ, მის მიმართ, სხვადასხვა დროს, ადგილი ჰქონდა სიტყვიერ შეურაცხყოფას და აგრესიას. აღნიშნულის შედეგად, ზვიად რატიანის ფსიქოლოგიური და ემოციური მდგომარეობა მნიშვნელოვნად გაუარესდა, მას მოერღვა უსაფრთხოების განცდა და განუვითარდა პოსტტრავმული სტრესული აშლილობა. აღნიშნული მოვლენების შედეგად გამოწვეული საზოგადოების მუდმივი წნეხის ქვეშ ცხოვრება მისთვის გაუსაძლისი გახდა. მოგვიანებით ზვიად რატიანმა საქართველო დატოვა. 

როგორც არასამტავრობო ორგანიზაცია აცხადებდა, შინაგან საქმეთა სამინისტროსთვის კარგად იყო ცნობილი, რომ ადმინისტრაციული სამართალდარღვევის საქმეზე მტკიცებულების სახით არსებული ვიდეოჩანაწერის გადაცემა მედია საშუალებისთვის, მის გასაჯაროებას გულისხმობდა, რაც თავის თავში გულისხმობდა იმ გარემოებას, რომ მოსარჩელის პერსონალური მონაცემების ამსახველ ვიდეოს მრავალი ათასი ადამიანი ნახავდა. სამინისტრო ასევე აცნობიერებდა, რომ ის მედიას გადასცემდა პერსონალური მონაცემების ამსახველ ვიდეოჩანაწერს, რომელსაც შესაძლოა მოსარჩელისთვის ჰქონოდა მსგავსი შედეგი. ამაზე მიუთითებს შსს-ს, 2017 წლის 24 დეკემბერის განცხადებაც, სადაც საუბარია, რომ სამინისტროს გააჩნია ზვიად რატიანის მხრიდან ადმინისტრაციული სამართალდარღვევის ჩადენის ამსახველი ვიდეომასალა, მაგრამ ამ დროისთვის არ მიიჩნევს სწორად საჯაროდ გამოიტანოს უცენზურო გამონათქვამებით აღსავსე ჩანაწერი.

აღსანიშნავია, რომ ზვიად რატიანის პოლიციელთა პირადი მობილური ტელეფონით ვიდეოგადაღების და შემდგომში, ამ ჩანაწერის მედიასაშუალებისთვის გაზიარების კანონიერებაზე იმსჯელა პერსონალურ მონაცემთა დაცვის ინსპექტორმა და 2018 წლის 23 თებერვლის გადაწყვეტილებით, შინაგან საქმეთა სამინისტრო სამართალდამრღვევად ცნო ორივე ნაწილში. ინსპექტორის გადაწყვეტილებით, შს სამინისტრო დაჯარიმდა 2000 ლარით, ზვიად რატიანის პოლიციის თანამშრომლების პერსონალური ტელეფონით ვიდეოგადაღების და პერსონალური მონაცემების ამსახველი ვიდეოკადრების მედიისთვის გადაცემის გამო.

კომენტარები

ამავე რუბრიკაში

23 ივლისი
23 ივლისი

მოსამართლეთა შერჩევის პროცესი იუსტიციის ...

უზენაესი სასამართლოს მოსამართლეობა საქართველოში იმდენად საოცნებო აღმოჩნდა, რომ მისი დაკავებისთვის თანამდებობები ეთმ ...
23 ივლისი
23 ივლისი

აღსრულდა თუ არა ნაჩქარევად სტრასბურგის გ ...

„რუსთავი 2“-ის საქმეზე სტრასბურგში მიღებულ გადაწყვეტილებას  და მასზე თანდართულ განმარტებით დოკუმენტებს ...
22 ივლისი
22 ივლისი

ოქრუაშვილი აცხადებს, რომ გამოძიებას არას ...

პოლიტიკური მოძრაობა „გამარჯვებული საქართველოს“ ლიდერმა ირაკლი ოქრუაშვილმა დღეს გამართულ ბრიფინგზე განაცხადა, ...
^