„მიმდინარე თვის ხელფასი უკვე გადაერიცხათ გაფიცულ სოციალურ მუშაკებს, თუმცა მომავალი თვიდან, ალბათ, კითხვის ნიშნის ქვეშ დადგება ხელფასის ანაზღაურება“, - ასე უპასუხა ჯანდაცვის მინისტრის მოადგილემ, თამარ ბარკალაიამ „ინტერპრესნიუსს“ კითხვაზე, ჯანდაცვის სამინისტროს ექნება თუ არა ორმაგი სახელფასო ხარჯი შტატგარეშე თანამშრომლების დამატებიდან გამომდინარე
მისივე თქმით, სოციალური მუშაკების გაფიცვის გამო ბენეფიციარებს მომსახურებას სამინისტროს თანამშრომლები და შტატგარეშე თანამშრომლები უწევენ, რაც პრობლემის დროებითი გადაწყვეტაა.
„თუ გაფიცვა გაგრძელდება, ავიყვანთ შტატგარეშე კადრებს, რაც ასევე პრობლემების დროებითი გადაწყვეტა იქნება. სწორედ ამიტომ ვიმედოვნებთ, რომ სოციალური მუშაკები სამუშაო რეჟიმში გააგრძელებენ ჩვენთან თანამშრომლობას“, - განაცხადა ბარკალაიამ.
კანონის მიხედვით, გაფიცვის დროს დამსაქმებელი არ არის ვალდებული მისცეს დასაქმებულებს შრომის ანაზღაურება, თუკი ეს გაფიცულთა მოთხოვნის ერთ-ერთ პირობად წარმოჩინდა და წარმატებით არ დასრულდა.
გაფიცვა არ არის შრომითი ურთიერთობის შეწყვეტის საფუძველი და დაუშვებელია ის ჩაითვალოს შრომის დისციპლინის დარღვევად (49-ე მუხლი)
