პრემიერ-მინისტრმა, მამუკა ბახტაძემ მთავრობის სხდომის დაწყებამდე გამართულ ბრიფინგზე განაცხადა, რომ დღევანდელ სხდომაზე ინიცირებული იქნება ახალი კანონპროექტი, რომლის მიხედვითაც, მთავრობა ვალდებული გახდება, მთლიანი შიდა პროდუქტის (მშპ) 6% განათლებაზე მიმართოს. 

„დღეს ინიცირებას გავუკეთებთ ახალ კანონპროექტს ჩვენი განათლების სექტორში, რომლის მიხედვითაც, არსებული თუ ნებისმიერი მომავალი ხელისუფლება ვალდებული იქნება, ჩვენი მთლიანი შიდა პროდუქტის 6% ანუ ბიუჯეტის მეოთხედი ყოველთვის მიმართოს განათლებაზე და ადამიანურ კაპიტალზე.  ჩვენ 2012 წელთან შედარებით 1 მილიარდით გავზარდეთ განათლების ბიუჯეტი და წელს არის მილიარდ 600 მილიონი , ჩვენ ამავე დროს ვიღებთ ვალდებულებას, რომ 2020 წელს ის იქნება 2 მილიარდი, 2021 წელს - 2 მილიარდ-ნახევარი, ხოლო 2022 წელს ის უკვე გაუტოლდება მშპ-ის 6%-ს ანუ ის იქნება 3 მილიარდ 400 მილიონი ლარი და ეს იქნება ის მინიმუმი , რომელიც ექნება ვალდებულებად ნებისმიერ ხელისუფლებას, რომ მიმართოს განათლებაზე, მიმართოს ჩვენს ახალგაზრდებზე, მიმართოს ადამიანური კაპიტალის განვითარებაზე“, - განაცხადა მამუკა ბახტაძემ.