მთავრობამ გამოსცა განკარგულება, რომელიც მაღალმთიანი დასახლებების განვითარების ფონდისთვის გამოყოფილ თანხებს ასახავს.
მთავრობის განკარგულებით, ფინანსთა სამინისტრო განათლების, მეცნიერების, კულტურისა და სპორტის სამინისტროს 150 000 ლარს გამოუყოფს საქართველოს ტექნიკური უნივერსიტეტისათვის გადასაცემად, რათა უნივერსიტეტის ბაზაზე შეიქმნას მთის ფაკულტეტი და მომზადდეს შესაბამისი სასაწავლო პროგრამა.
განკარგულების მიხედვით, ფინანსთა სამინისტრომ უნდა უზრუნველყოს სასოფლო-სამეურნეო კოოპერატივების განვითარების სააგენტოსთვის არა უმეტეს 10 808 985 ლარის გამოყოფა, საიდანაც 8 793 985 ლარი მიმართული იქნება „მაღალმთიან რეგიონებში სახელმწიფო საკუთრებაში არსებული სათიბ-საძოვრების რაციონალურად გამოყენების სახელმწიფო პროგრამის“ განსახორციელებლად.
1 140 000 ლარი მიმართული იქნება „მევენახეობის სასოფლო-სამეურნეო კოოპერატივების ხელშეწყობის სახელმწიფო პროგრამისთვის“.
ხოლო 875 000 ლარი - „რძის მწარმოებელი სასოფლო-სამეურნეო კოოპერატივების მხარდაჭერის სახელმწიფო პროგრამისათვის“.
გარდა ამისა, განკარგულების მიხედვით, საქართველოს ფინანსთა სამინისტრო უზრუნველყოფს განათლების, მეცნიერების, კულტურისა და სპორტის სამინისტროსათვის 550 000 ლარის გამოყოფას სკოლა-პანსიონატების სარეაბილიტაციოდ.
ასევე, განკარგულების თანახმად, ფინანსთა სამინისტრო უზრუნველყოფს რეგიონული განვითარებისა და ინფრასტრუქტურის სამინისტროსთვის 2 მილიონი ლარის გამოყოფას, მუნიციპალიტეტებთან ერთად ელექტროენერგიის გარეშე არსებული დასახლებებისათვის მზის პანელების შესაძენად.
