დღეს მედიაში გავრცელდა ფოტოები ბიძინა ივანიშვილის და ილია მეორის შეხვედრიდან საქართველოს საპატრიარქო რეზიდენციაში, სადაც ჩანს, რომ რეზიდენციის ერთ-ერთ ოთახში რუსეთის პატრიარქის, ალექსი 1-ის პორტრეტი კიდია.

ამან სოციალურ ქსელებში აჯიოტაჟი გამოიწვია, საზოგადოების ნაწილმა საქართველოს საპატრიარქო გააკრიტიკა.

კრიტიკის პასუხად საპატრიარქო განცხადებას ავრცელებს:

"საპატრიარქო რეზიდენციის ერთ-ერთ შესასვლელ ოთახში კედელზე კიდია ორი პირველიერარქის ფერწერული პორტრეტი, რადგან მათ სახელს უკავშირდება საქართველოს ეკლესიის ავტოკეფალიის აღდგენის ცნობა.

ესენია:

რუსეთის პატრიარქი უწმიდესი ალექსი I, რომელიც 1943 წელს საქართველოს ეკლესიის ავტოკეფალიის აღიარების შემდეგ პირველად ოფიციალურად ჩამოვიდა საქართველოში და მცხეთაში უწმიდეს კალისტრატესთან ერთად ერთობლივი წირვა აღასრულა.

და

მსოფლიო პატრიარქი, ყოვლადუწმინდესი დიმიტრიოსი, რომელმაც 1990 წელს საპატრიარქო სიგელებით დაადასტურა საქართველოს ეკლესიის ავტოკეფალიის ცნობა უძველესი დროიდან.

ასე რომ, ნებისმიერი პიროვნება კადრში შეიძლება მოხვდეს როგორც ერთ, ისე მეორე პიროვნების პორტრეტთან.

დღეს კათოლიკოს-პატრიარქისა და ბ-ნ ბიძინა ივანიშვილის შეხვედრის ფოტოზე, უკანა პლანზე,  ჩანს პატრიარქ ალექსი I-ის სურათი, რაც ზოგიერთებისთვის ქილიკის მიზეზი გახდა.

სამწუხაროდ, ბოლო დროს  ეკლესიის მიმართ უსაფუძვლო, ცილისმწამებლური და შეურაცხმყოფელი ქმედებები არის გახშირებული და ცალკეული პიროვნებების დღევანდელი კომენტარებიც ამის კიდევ ერთი დადასტურებაა.

P.S. კადრში ჩანს ორივე პატრიარქის ფერწერული ტილო". - წერია საქართველოს საპატრიარქოს განცხადებაში.