„ჩვენი ხელისუფლება ხალხს ულტიმატუმებით არ ესაუბრება, ასევე, კონკრეტული საზოგადოების ჯგუფებისგან ულტიმატუმის ენას პირადად ვერ მივიღებ, თუმცა კონსულტაციებისთვის მზად ვარ“,- განაცხადა იუსტიციის მინისტრმა, თეა წულუკიანმა „საზოგადოებრივი მაუწყებლის“ ცნობით, რუსთავში ციხის მშენებლობასთან დაკავშირებით მიმდინარე აქციებზე.
„შეხვედრები გაგრძელდება, მაგრამ ეს იქნება კონსულტაციები და არა ულტიმატუმების ენა. ეს მიწა ყოფილ სასჯელაღსრულების სამინისტროს ციხეების მშენებლობისთვის გადაეცა 2018 წლის აპრილში, ვიდრე სისტემა იუსტიციის სამინისტროს ნაწილი გახდებოდა. შესაბამისად, თუ მაშინ, იმ დროს და მას შემდეგ რაიმე კონსულტაცია მოსახლეობას დააკლდა, რა თქმა უნდა, ეს უნდა გამოვასწოროთ. მაგრამ, ჩვენ ვართ ის ხელისუფლება, რომელიც საკუთარ ხალხს ულტიმატუმებით არ ესაუბრება, ასევე მოცემული საზოგადოების ჯგუფებისგან ულტიმატუმის ენას მე პირადად ვერ მივიღებ, თუმცა კონსულტაციებისთვის, ჯანსაღი მსჯელობისთვის, თუ რა ტიპის პროექტია ეს და რას გააუმჯობესებს ქალაქისთვის, ნებისმიერ დროს ვარ მზად“,- განაცხადა თეა წულუკიანმა.